സർക്കാർ നടത്തുന്ന ഭൂമി കയ്യേറ്റങ്ങൾ

മത്സ്യത്തൊഴിലാളികളുടെ ഷെഡ്ഡുകൾ പൊളിച്ചു തുടങ്ങിയ ഭരണകൂട ഭീകരത മുതലാളിത്ത മൂലധനത്തിന്റെ സുഗമമായ ഒഴുക്കു സാധ്യമാക്കാനുള്ള യജ്ഞത്തിൽ ജനങ്ങളുടെ ഭൂമി പിടിച്ചെടുക്കുന്നതിലാണ് പിന്നീട് ശ്രദ്ധിക്കുന്നത്. ഇന്ന് അമിനിയിലും കല്പേനിയിലും സർക്കാർ പൊളിക്കൽ നടപടികൾ തുടരുന്നു. അമ്മിനിയിൽ പൊളിക്കൽ നടപടികൾ തടയാൻ ശ്രമിച്ച കോൺഗ്രസ് പ്രവർത്തകരെ അറസ്റ്റ് ചെയ്തു നീക്കി. നൂറോളം കേസുകളിലായി നാലായിരത്തോളം ഹർജിക്കാർ ഇന്ന് ഭൂമി വിഷയത്തിൽ സർക്കാരിനെതിരെ നിയമനടപടികൾ നടത്തുകയാണ്. പണ്ടാരം ഭൂമി എന്നറിയപ്പെടുന്ന പണ്ട് അറക്കൽ രാജവംശം ലക്ഷദ്വീപുകാരിൽ നിന്നും അനധികൃതമായി പിടിച്ചെടുത്ത ദ്വീപുകാർക്ക്‌ തന്നെ പാട്ടത്തിന് നൽകിയ ഭൂമി പിന്നീട് ബ്രിട്ടീഷുകാർ പാട്ടത്തിനു നൽകുകയും . ഇന്ത്യയോടൊപ്പം ചേർന്നപ്പോൾ ആദ്യം പാട്ടത്തിന് ജനങ്ങൾക്ക് കൊടുത്തെങ്കിലും 2020-ൽ ജനങ്ങൾ കൈ വശം വെച്ച ഈ ഭൂസ്വത്തുക്കൾ ജനങ്ങൾക്ക് തന്നെ പതിച്ചു നൽകാൻ ഉത്തരവിട്ടതായിരുന്നു. എന്നാൽ വിവാദ അഡ്മിനിസ്ട്രേറ്റർ പ്രഫുൽ പട്ടേൽ കേന്ദ്ര സർക്കാരിൽ സ്വാധീനം ചെലുത്തി ഈ ജനങ്ങൾക്ക് പതിച്ചു നൽകാൻ വേണ്ടി ലക്ഷദ്വീപ് ടെനൻസി റെഗുലേഷൻ 1965 ഇൽ എഴുതിച്ചേർത്ത സെക്ഷൻ 15A പിൻവലിപ്പിച്ചു അതോടെ അഞ്ചു ദ്വീപുകളിലെ ഏകദേശം അറുപത് ശതമാനത്തോളം ഭൂമി സർക്കാരിന്റേതാണെന്നുള്ള വാദം വീണ്ടും ഉയർന്നു വന്നു. കളക്ടർ ഇത്രയും ഭൂമി ഞങ്ങളുടേതാണെന്നും ജനങ്ങൾ ഇറങ്ങിത്തരണമെന്നും ഉത്തരവിട്ടു. ഇപ്പോൾ കേസ് കോടതിയിലാണ്. ഒരു മറു വിധി വലിയൊരു ദുരന്തമാണ് ലക്ഷദ്വീപിൽ ഉണ്ടാക്കുക. അത് കൂടാതെ ഒളിഞ്ഞും തെളിഞ്ഞും ജനങ്ങളുടെ ഭൂമി പിടിച്ചെടുക്കാനുള്ള ശ്രമങ്ങൾ സർക്കാർ തുടർന്ന് കൊണ്ടിരിക്കുന്നു. ആൾതാമസമില്ലാത്ത തിണ്ണകര ദ്വീപിൽ അനധികൃതമായി ഭൂമി കയ്യേറുന്നത് തടയാൻ ഒരു സൗകര്യവുമില്ലാത്ത ദ്വീപിൽ പോയി താമസിക്കുകയാണ്.ഒരു ഭരണകൂടത്തിൽ നിന്നും സംരക്ഷിക്കാൻ ജനങ്ങൾ വൈദ്യുതി പോലുമില്ലാത്ത ദ്വീപിൽ ഭൂമിക്ക് കവലിരിക്കണ്ട അവസ്ഥയാണ്.

തകർക്കപ്പെടുന്ന വിദ്യാഭ്യാസ മേഖല

ഇത്രയും ഭൂമി ഒരു തർക്ക ഭൂമി ആയത് കൊണ്ട് തന്നെ കൂട്ട പിരിച്ചു വിടലുകൾക്കും ഭൂമി കയ്യേറ്റത്തിനും ഇപ്പോൾ ഗൂഢാലോചന നടക്കുന്നത് വിദ്യാഭ്യാസരംഗത്താണ്. സ്കൂളുകളുടെ എണ്ണം ഗണ്യമായി കുറയ്ക്കുകയാണ് ലക്ഷ്യം. 2020-ൽ പ്രഫുൽ പട്ടേൽ ചാർജ് എടുക്കുമ്പോൾ 63 കെട്ടിടങ്ങളിലായി പ്രവർത്തിച്ചിരുന്ന ലക്ഷദ്വീപിലെ സ്കൂളുകൾ ഇപ്പോൾ പ്രവർത്തിക്കുന്നത് 32 കെട്ടിടങ്ങളിലായിട്ടാണ്. അടച്ചു പൂട്ടലുകൾ തുടർന്നു കൊണ്ടിരിക്കുന്നു. കുട്ടികളുടെ എണ്ണം കുറയ്ക്കുന്നു, കെട്ടിടങ്ങൾ ചുരുക്കി കൂടുതൽ കുട്ടികളുള്ള ക്ലാസ് മുറികളുണ്ടാക്കുന്നു. പുതിയ കെട്ടിടങ്ങൾ നിർമിക്കണമെന്ന വ്യാജേന മിക്ക ദ്വീപുകളിലെയും സ്കൂൾ കെട്ടിടങ്ങൾ തകർത്തു. കവരത്തിയിലെ വർഷങ്ങളോളം പഴക്കമുള്ള സ്കൂൾ കെട്ടിടം തകർത്തു പക്ഷെ പകരം നിർമിക്കുമെന്ന് പറഞ്ഞ ആ കെട്ടിടം നിർമാണം തുടങ്ങിയിട്ട് പോലുമില്ല. അതു കൊണ്ട് തന്നെ ഈ അധ്യയനവർഷത്തിൽ എല്ലാവരും കൂടി ആകെയുള്ള വടക്കു ഭാഗത്തുള്ള സ്‌കൂളിൽ അഡ്ജസ്റ്റ് ചെയ്യേണ്ട അവസ്ഥയാണ്.

സ്കൂൾ തുറക്കുമ്പോഴത്തേക്കും കുട്ടികൾക്കിരിക്കാൻ ക്ലാസ് മുറികളില്ലാത്ത ഇന്ത്യയിലെ പ്രദേശങ്ങളിലൊന്നായി ഈ വർഷം ലക്ഷദ്വീപ് മാറി. അഗതി ദ്വീപിൽ പ്രവേശനോത്സവത്തിൽ പങ്കെടുക്കാനെത്തിയ വിദ്യാഭ്യാസ സെക്രെട്ടറി വിക്രാന്ത് രാജയെ വരവേറ്റത് സ്കൂളടച്ചതിൽ പ്രധിഷേധിക്കുന്ന രക്ഷിതാക്കളാണ്. സൗകര്യങ്ങൾ കൂടിപ്പോയി എന്ന വാദമുയർത്തി സ്കൂൾ കെട്ടിടങ്ങൾ അടച്ചു പൂട്ടി ഒരു ദ്വീപിൽ ഒരു സ്കൂൾ മാത്രമാക്കാനുള്ള ശ്രമം നടത്തുമ്പോൾ പക്ഷെ ആ ഒരൊറ്റ കെട്ടിടത്തിൽ അല്ലെങ്കിൽ ബാക്കിയുള്ള കെട്ടിടങ്ങളിൽ ദ്വീപിലെ എല്ലാ കുട്ടികൾക്കും പഠിക്കാനുള്ള സൗകര്യം ഉണ്ടോ എന്നുള്ള ഒരു പരിശോധനയും നടത്തുന്നില്ല. കേരളാ സ്റ്റേറ്റ് ഇംഗ്ലീഷ് മീഡിയം നിരോധിക്കുന്നു, പിന്നീട് മലയാളം മീഡിയം വേണ്ട CBSE മാത്രം മതി എന്ന് വെക്കുന്നു ആ തീരുമാനം ഇപ്പോൾ ഹൈ കോടതി സ്റ്റേ ചെയ്തിരിക്കുകയാണ്. ത്രിഭാഷാ പന്ധതി നടപ്പിലാക്കാനാണെന്ന വ്യാജേന അറബി പഠിപ്പിക്കുന്നത് നിർത്തലാക്കുന്നു.

കെട്ടിടങ്ങളുടെ എണ്ണം കുറക്കുന്നതിലൂടെ അഡ്മിനിസ്ട്രേറ്ററുടെ ഇഷ്ട വിനോദമായി കെട്ടിട നിർമാണത്തിന് കൂടുതൽ സ്ഥലം ലഭിക്കുന്നു. ഒരേ കെട്ടിടത്തിൽ കുറെ കുട്ടികളുണ്ടാകുമ്പോൾ അധ്യാപകരുടെ എണ്ണത്തിൽ ഗണ്യമായ കുറവ് വരുത്താൻ സാധിക്കും. അതു കൊണ്ട് തന്നെ പിരിഞ്ഞ് പോകുന്ന അദ്ധ്യാപകർക്ക് പകരം വേറെ ഒരാളെ നിയമിക്കേണ്ടതില്ല എന്നു തീരുമാനിക്കുന്നു. അഞ്ച് വർത്തിൽ കൂടുതൽ ഒരു തസ്തിക ഒഴിച്ചിടുമ്പോൾ അത് റദ്ദാക്കിയതായി കണക്കാനുള്ള കേന്ദ്ര സർക്കാർ വിജ്ഞാപനത്തിന്റെ അടിസ്ഥാനത്തിൽ തസ്തികകൾ എന്നെന്നേക്കുമായി ഇല്ലാതാക്കുന്നു. ലക്ഷദ്വീപിലെ ഓൺലൈൻ ന്യൂസ് പോർട്ടലായ Thebelaram.com പുറത്തു വിട്ട കണക്കനുസരിച് 2171 സ്ഥിരം തസ്തികകൾ ലക്ഷദ്വീപ് ഭരണകൂടം ഒഴിച്ചിട്ടിരിക്കുകയാണ്.