അക്കങ്ങളുടെ ആശയ സംഹിതയാണ് ഗണിതശാസ്ത്രം. മനുഷ്യന്റെ പ്രധാന കണ്ടുപിടിത്തങ്ങളിൽ ഒന്നാണ് അക്ക നിർമ്മിതി. കേരളത്തിൽ പല രീതിയിലുള്ള അക്ക സമ്പ്രദായങ്ങളും നിലനിന്നിരുന്നു. പ്രാചീന ഹസ്തലിഖിതങ്ങളിൽ അക്ഷരപല്ലി,അങ്കപല്ലി, കടപയാതി നന്നന്യാദി,വട്ടെഴുത്ത് തുടങ്ങിയവയാണ് പ്രധാനമായും ഉപയോഗിച്ചിരുന്ന അക്ക സമ്പ്രദായങ്ങൾ. ഇവയിൽ വട്ടെഴുത്ത് അക്കങ്ങൾ ആണ് കേരളത്തിലെ വൈജ്ഞാനിക വിഷയങ്ങൾ കൈകാര്യം ചെയ്യുന്ന ഹസ്ത ലിഖിതങ്ങളിൽ പൊതുവെ ഉപയോഗിച്ചുവന്നിരുന്നത്. വട്ടെ ഴുത്ത് അക്കങ്ങളെ കുറിച്ചുള്ള ഒരു സാമാന്യ പരിചയമാണ് ഈ പ്രബന്ധത്തിൽ സാധ്യമാക്കുന്നത്.

കേരളത്തിൽ നിലനിന്നിരുന്ന പ്രാചീന ലിപിയാണ് വട്ടെഴുത്ത്. പതിനാറാം നൂറ്റാണ്ട് വരെയും കേരളത്തിൽ വട്ടെഴുത്ത് ലിപി പ്രചാരത്തിലുണ്ടായിരുന്നു. എന്നാൽ വട്ടെഴുത്തു ലിപിയിൽ രേഖപ്പെടുത്തിയിട്ടുള്ള കൃതികളിൽ മാത്രമല്ല വട്ടെഴുത്ത് അക്കങ്ങൾ ഉപയോഗിച്ചിരുന്നത്. പ്രാചീന മലയാള ലിപിയിലുള്ള രേഖകളിലും വട്ടെഴുത്തക്കങ്ങൾ സാർവത്രികമായി ഉപയോഗിച്ചു പോന്നിരുന്നു.

സ്ഥാന വില നിർണയിച്ചുകൊണ്ടുള്ള അക്കനിർണ്ണയ രീതിയാണ് വട്ടെഴുത്തിൽ സ്വീകരിച്ചിരുന്നത്. ഗണിതശാസ്ത്രത്തിൽ വിപ്ലവകരമായ നേട്ടങ്ങൾക്ക് കാരണമായത് പൂജ്യത്തിന്റെ കണ്ടെത്തലാണ്. വട്ടെഴുത്തക്കങ്ങളിൽ പൂജ്യം ഇല്ല. അതായത് പൂജ്യം കണ്ടുപിടിക്കുന്നതിന് മുമ്പായിരിക്കണം വട്ടെഴുത്തക്കങ്ങൾ പ്രയോഗിച്ചുതുടങ്ങിയത്. ഏതു വലിയ സംഖ്യയെയും സൂചിപ്പിക്കാൻ വട്ടെഴുത്തക്കങ്ങൾക്ക് കഴിയുമായിരുന്നു എന്നതും ശ്രദ്ധേയമാണ്. ഒന്നു മുതൽ ഒൻപത് വരെയുള്ള അക്കങ്ങൾക്കുശേഷം 10,100,1000 ഇവയ്ക്ക് പ്രത്യേക അക്കങ്ങൾ ഉപയോഗിച്ചുകൊണ്ടാണ് വട്ടെഴുത്തക്കങ്ങൾ രേഖപ്പെടുത്തിയിരുന്നത്. ആയിരത്തിനു ശേഷം വരുന്ന അക്കങ്ങളെല്ലാം ആയിരത്തിന്റെ പെരുക്കങ്ങൾ ആയിട്ടാണ് ഉപയോഗിച്ചിരുന്നത്.