കോഴിക്കോട് സാമൂതിരി രാജാവിന്റെ അധ്യക്ഷതയിൽ നടന്നിരുന്ന തർക്കശാസ്ത്ര സദസായ രേവതി പട്ടത്താനം പോലുള്ള വിദ്വത്സദസ്സുകളെ വി.കെ.എൻ കുളക്കോഴി വാദം എന്ന പേരിൽ പാരഡിയാക്കി പരിഹസിക്കുന്നു.ആഢ്യ ബ്രാഹ്മണ പണ്ഡിതസദസ്സുകളിലെ നിരർത്ഥക വാദകോലാഹലങ്ങൾ പതിറ്റാണ്ടുകൾ ഭാഷയിലും സാഹിത്യത്തിലും ചരിത്രത്തിലും ചെലുത്തിയ അപഹാസ്യമായ സ്വാധീനത്തെ അതർഹിക്കുന്ന  ക്രൂരതയോടെ എടുത്തുനിലത്തടിക്കുന്നു.ജന്മനാ പണ്ഡിതനായിരുന്ന നാണു നമ്പൂതിരിയുടെ പ്രശസ്തി എമ്പാടും പരന്നത് വിഖ്യാതമായ ‘കുളക്കോഴിവാദ’ത്തിനുശേഷമാണ്. മലയാളത്തിലെ ബ്രാഹ്മണ പണ്ഡിതർക്കിടയിൽ നടന്ന ഒരു പ്രത്യേക വാദമായിരുന്നു ‘കുളക്കോഴിവാദം.’ഏതോ പണ്ഡിതൻ ഏതോ സ്ഥലത്ത് വെച്ച് ഉന്നയിച്ച കുളക്കോഴി കൂകുന്നതിന്റെ ശബ്ദം ക്വ ക്വ എന്നോ ഗ്വ ഗ്വ എന്നോ – എന്നതായിരുന്നു പണ്ഡിതരെ കുഴപ്പിച്ച ബൗദ്ധിക പ്രശ്നം! യുദ്ധം ഒരു കൊല്ലത്തേക്ക് നീണ്ടു നിന്നത്രേ! പണ്ഡിതക്കോഴികൾ ചേരിതിരിഞ്ഞ് കൂവി. ഇത് കേട്ട് ഒരു താക്കീതെന്ന നിലയിൽ പോലീസ് വായുവിൽ മൂന്നുവട്ടം വെടിവെച്ചു!! ഭക്ഷണം കഴിക്കലും വാദപ്രതിവാദങ്ങളും ഒരേസമയമാണ് നടക്കുന്നത്.കുമാരസംഭവത്തിൽ മേഘത്തെപ്പറ്റി കാളിദാസൻ പറയുന്ന ‘സന്നിപാതം ക്വ മേഘ:’ എന്ന പദത്തെക്കുറിച്ച് നമ്പൂതിരി ആരാഞ്ഞതും സദസ്സ് നിശ്ശബ്ദമായി !

“കൂട്ടമരണം ഉണ്ടായാലേ ഇത്രയും നിശ്ശബ്ദതയുണ്ടാവൂ” എന്ന് വി കെ എൻ എഴുതുന്നു. എന്തായാലും കുളക്കോഴിയുടെ കൂവൽ ഗ്വ ഗ്വ എന്നാണെന്ന നമ്പൂതിരിയുടെ അന്തിമ പ്രഖ്യാപനം വന്നതോടുകൂടി യുദ്ധത്തിന് അറുതിയായി. അർഥമോ ആശയമോ അറിയാത്ത സംസ്കൃത ശ്ലോകങ്ങൾ ഉദ്ധരിച്ച് നടന്നുവന്ന നിരർഥക ചർച്ചകളുടെ ഉള്ളിലുള്ളത്, ഉദരപൂരണവും സ്ത്രീലമ്പടത്വവുമാണെന്ന് വി. കെ. എൻ. അടിവര ഇടുന്നു.

“ഗ്വ ഗ്വ എന്നാം കുളക്കോഴി

നാടൻ കോഴികളും തഥാ

 ഇട്ടുണ്ണൂലികൾ ഇല്ലെങ്കിൽ

നേരമ്പോക്കുകളും തഥാ ”

എന്ന വി.കെ.എൻ നിർമ്മിച്ച പാരഡി, ഒരുകാലത്ത് ഭാഷയിലും ചരിത്രത്തിലും സാഹിത്യത്തിലും അടയാളപ്പെട്ട പണ്ഡിത സദസ്സുകൾക്കും പരിഹാസ്യ വാദകോലാഹലങ്ങൾക്കും നൽകുന്ന തലയ്ക്കടി ചെറുതല്ല.

ബുദ്ധിയുള്ള പെണ്ണുങ്ങൾ

നല്ല ചിന്താശേഷിയും ബുദ്ധിയും കഴിവും പ്രാപ്തിയുമുള്ള രസികത്തികളായ പെണ്ണുങ്ങളാണ് മഞ്ചലിന്റെ എടുത്തുപറയേണ്ട ഒരു  പ്രത്യേകത.”ദീർഘമായി ആലോചിച്ചില്ലെങ്കിൽ ചിലപ്പോൾ സ്ത്രീകൾ ഹ്രസ്വമായിപ്പോകും” എന്ന തിരിച്ചറിവുള്ള പെണ്ണുങ്ങൾ ! ആരെയും കൂസാത്ത, പുരുഷൻമാരെ വരച്ച വരയിൽ നിര്‍ത്തുന്ന, ഒന്നിലധികം പുരുഷന്മാരെ സ്നേഹിക്കുന്ന, വേണ്ടെന്നു തോന്നുമ്പോൾ ഉപേക്ഷിക്കുന്ന, മറ്റൊരാളെ സ്വീകരിക്കുന്ന അസാധാരണരായ പെണ്ണുങ്ങളാണ് മഞ്ചലിൽ  ഉള്ളത്.പ്രധാനമായും മഞ്ചലില്‍ മൂന്ന് സ്ത്രീകള്‍ കടന്നുവരുന്നുണ്ടെങ്കിലും എടുത്തുപറയേണ്ട രണ്ടു പേര്‍ കുഞ്ഞിമാളുവും ഉണ്ണുനീലിയുമാണ്. വിഡ്ഢി സാമ്രാട്ടും ‘കുളക്കോഴിവീരനു’മായ നാണു നമ്പൂതിരി പുടവ കൊടുത്ത, കുട്ടി രാമനെ പ്രേമിച്ച് മനസ്സും ശരീരവും പങ്കുവെച്ച ശേഷം അധികാരിയായ ഉഗ്രൻ നമ്പ്യാരുടെ ഭാര്യയാകുന്ന കുഞ്ഞിമാളുവാണ് പ്രധാന സ്ത്രീകഥാപാത്രം.തനിക്ക് പുടവ തരാന്‍ നാണു നമ്പൂതിരി വരുന്നുവെന്ന് വല്യമ്മ ഉണ്ണുനീലിയിൽ നിന്നറിഞ്ഞ കുഞ്ഞുമാളു ‘ആര് നിശ്ചയിച്ചു?’ എന്ന് ചോദിക്കുന്നു.ഏട്ടൻ കണ്ടർ മേനോൻ ആണെന്നറിയുമ്പോൾ എന്നാൽ ‘ഏട്ടൻ പുടവ മേടിച്ചോട്ടെ’എന്ന് പറയാൻ ധൈര്യം കാണിക്കുന്നവളാണ് പെണ്‍കൊടി. നമ്പൂതിരിയെ ഒഴിവാക്കാനായാണ് വല്യമ്മയുടെ നിർദ്ദേശപ്രകാരം കളിക്കൂട്ടുകാരനായ കുട്ടിരാമനുമായി പെൺകിടാവ് പ്രണയത്തിലാവുന്നത്. അന്നത്തെ രീതിയനുസരിച്ച് നമ്പൂതിരിയുമായി പരസ്യബന്ധവും കുട്ടിരാമനുമായി രഹസ്യബന്ധവും ആകാമായിരുന്നു. പക്ഷേ, കുഞ്ഞുമാളു അതിന് ഒരുക്കമല്ലായിരുന്നു.

അതുകൊണ്ട് ആത്മഹത്യയ്ക്കും പെൺകിടാവ് ശ്രമിച്ചില്ല.ഒളിച്ചോടാനൊ മരിക്കാനൊ നമ്പൂതിരിയെ വധിക്കാനൊ ധൈര്യമില്ലാത്ത ഭീരുവായ കാമുകന് നമ്പൂതിരിയുമായുള്ള ബന്ധം വിഷയമല്ലായിരുന്നു.സംബന്ധത്തിന് വന്ന നമ്പൂതിരിയെ ‘അശുദ്ധ’മാണെന്ന് പറഞ്ഞ് തിരിച്ചയച്ച കുഞ്ഞിമാളു അടുത്ത തവണ എന്തുപായം പ്രയോഗിക്കുമെന്ന ആശങ്കയിൽ ഇരിക്കുമ്പോഴാണ് തുക്ടിസായിപ്പിന്‍റെ ശിരസ്തദാരായ ഉഗ്രൻ നമ്പ്യാരുടെ രംഗപ്രവേശം.ഭാര്യക്ക് നമ്പൂതിരി സംബന്ധം ഉണ്ടാകുന്നത് പ്രശ്നമല്ലാതിരുന്ന കാമുകനെ വിട്ട് കുഞ്ഞിമാളു നമ്പൂതിരിയുടെ ബഹുസംബന്ധം തന്നെ  നിർത്തലാക്കാൻ അധികാരമുള്ള പുരുഷനെ തിരഞ്ഞെടുക്കുന്നു. പിടിച്ചുകൊടുത്തിട്ടും നമ്പൂതിരിയുടെകൂടെ പോവാത്ത വിപ്ലവകാരിപ്പെണ്ണായാണ് ഉഗ്രന്‍ നമ്പ്യാര്‍ കുഞ്ഞിമാളുവിനെ കാണുന്നത്. ഗദ്യത്തിലും പദ്യത്തിലും നാടൻ ഭാഷയിലും ജനം സ്തുതി ഗീതങ്ങൾ പാടിയിരുന്ന ബഹു സുന്ദരിയായിരുന്നു കുഞ്ഞിമാളുവിന്റെ വല്യമ്മ ഉണ്ണുനീലി.അമ്പലവാസിയായ ഒരു വാര്യർ ആയിരുന്നു ഉണ്ണുനീലിയുടെ ആദ്യ സംബന്ധക്കാരൻ ഭർത്താവ്. ആ ബന്ധത്തിൽ മക്കളില്ലാതിരുന്ന ഉണ്ണുനീലി ഭർത്താവിനോട് താനൊരു വാരിയ പ്രജയെ നൽകാത്തതിൽ കുണ്ഠിതമുണ്ടല്ലേ, എന്ന് ചോദിക്കുന്നു.കുപിതനായ വാരിയർ നായർ സ്ത്രീയിൽ എങ്ങനെയാണ് വാരിയ പ്രജ ഉണ്ടാകുന്നതെന്നും നായർ പ്രജയാണ് സംഭവിക്കുക എന്നും തിരുത്തുന്നു. വാരിയന്റെ ചിറിക്കിട്ട് ഒന്ന് പൂശാനാണ് അവൾക്ക് തോന്നിയത്. ജാതിയെ അപമാനിച്ച് സംസാരിക്കരുതെന്ന് പുലമ്പിയ വാര്യരെ കണ്ട് പുരുഷന്മാർക്ക് സൗന്ദര്യം മാത്രം ഉണ്ടായാൽ പോരാ, ബുദ്ധി കൂടി വേണമെന്നും  തലയിൽ അന്നം കഷ്ടിയായ ഒരുവന്റെ കളിപ്പാട്ടമാകേണ്ടി വന്നല്ലോയെന്നും അവള്‍  പരിതപിക്കുന്നു.ഭാര്യയുടെ മനസ്സ് വായിക്കാൻ അറിയാത്ത വാര്യരെ ഉടന്‍ തന്നെ വധിക്കാനാണ് തോന്നിയതെങ്കിലും പോസ്റ്റ്മോർട്ടത്തിന്റെയും മറ്റും ബുദ്ധിമുട്ടോര്‍ത്ത് തൽക്കാലമത് മാറ്റി വയ്ക്കുകയായിരുന്നത്രേ !ഭർത്താവിനോട് മുഷിഞ്ഞിരുന്ന ഉണ്ണുനീലിയെ അനുനയിപ്പിക്കാൻ ‘എന്താണ് വേണ്ടതെ’ന്ന  നിർബന്ധിച്ചുള്ള ചോദ്യത്തിന് തനിക്ക് ഒരു വാരിയപ്രജ മതി എന്നവൾ ആവര്‍ത്തിക്കുന്നു. കലി കയറിയ വാരിയർ സംബന്ധം അവസാനിപ്പിച്ച് പോകാനൊരുങ്ങുമ്പോൾ ഉണ്ണുനീലി കോട്ടുവായിട്ട് തിരിഞ്ഞു കിടന്ന് സുഖമായി ഉറങ്ങുകയാണ്.

അങ്ങനെയിരിക്കെയാണ് പണ്ഡിതനായ കോമൻ നായരുമായി ഉണ്ണു നീലി പ്രണയത്തിലാവുന്നത്. സംഭവമറിഞ്ഞ വാരിയർ,’ കോമൻ നായർ നിനക്ക് രഹസ്യമുണ്ടെന്ന് നാടുമുഴുവൻ പാട്ടാണ്’ എന്ന് പറയുമ്പോൾ, പാട്ടിന്‍റെ രാഗം എന്താണ് എന്നാണ് ഉണ്ണുനീലിയുടെ മറുചോദ്യം !ഒടുവിൽ സംഭവം ഉണ്ണു നീലിയുടെ കോർട്ടിൽ തന്നെ തീർപ്പിനായി എത്തുന്നു.ആറുമാസം വാരിയർ, ആറുമാസം കോമൻ നായർ- എന്നതായിരുന്നു വിധി! തീർപ്പ് കല്പിച്ച കോടതിവിധിക്കെതിരെ അപ്പീലുണ്ടോ എന്ന് ഉണ്ണുനീലി  വാര്യരോട് ചോദിക്കുന്നു. ഉണ്ടെന്നു വാര്യർ. എങ്കിൽ അതും തന്റെ കോടതിയിൽ തന്നെ എന്ന് പ്രഖ്യാപിച്ച സുന്ദരി മുൻവിധി സ്ഥിരീകരിച്ചിരിക്കുന്നതായി ഉത്തരവ് പുറപ്പെടുവിക്കുന്നു.സദ്യയും സംബന്ധവും മാത്രം ലക്ഷ്യം വെച്ച് ജീവിക്കുന്ന ഇരപിടിയന്മാരായ നമ്പൂതിരിമാരെ പൂട്ടാനുള്ള ഉപായം അധികാരമുള്ള പുരുഷനോട് നയത്തിൽ നിർദ്ദേശിക്കാനും അവർക്ക് കഴിയുന്നുണ്ട്. സംബന്ധത്തിന് നമ്പൂതിരിമാർ മിനക്കെടുന്നത്, ഒരു പണിയുമില്ലാതെ ഇരിക്കുന്നതിനാൽ ആണെന്നും അവർക്കും തൊഴിൽ ക്യാമ്പുകൾ ഏർപ്പെടുത്തണമെന്നും അണകെട്ടുകയോ തോട് കീറുകയോ വിറകു വെട്ടുകയോ ചെയ്യട്ടെ എന്നുമുള്ള വിപ്ലകരമായ നിർദ്ദേശവും ഉണ്ണുനീലി മുന്നോട്ട് വയ്ക്കുന്നുണ്ട്.

സാഹിത്യവും കലയും സാധാരണ മനുഷ്യരിൽ നിന്നകലുകയും സവർണ്ണ മേലാളന്മാരുടെ കെട്ടിലകങ്ങളിൽ ശ്വാസംമുട്ടി ചത്തുപോവുകയും ചീഞ്ഞുനാറുകയും ചെയ്യുന്നതിന്റെ കാഴ്ചകളാണ് ചരിത്രത്തിൽ നിന്ന് വി കെ എൻ കണ്ടെടുക്കുന്നത്.മണ്ണും പെണ്ണും സാഹിത്യവും ഈ തരത്തിൽ അധിനിവേശത്തിന് ഇരയാകുന്നതിന്റെ ചരിത്ര കാഴ്ചകൾ ഹാസ്യത്തിന്റെ വെടിക്കെട്ടാവുന്നതിന്റെ ശബ്ദസന്നിവേശം ചെയ്ത ദൃശ്യ ചിത്രങ്ങളാണ് ‘മഞ്ചലി’ൽ വായനക്കാർ കാണുന്നത്.