അന്ത്യശ്വാസം
ആഞ്ഞുവലിച്ച് അകത്താക്കി.
നീണ്ട നെടുവീർപ്പായി
ഇടറിയും പിടഞ്ഞും
ശ്വാസം പുറത്തു പോയി.
പിന്നെ ശ്വസിച്ചിട്ടില്ല.

അന്തരീക്ഷത്തിലലയടിക്കുന്ന
ഓക്സിജൻ കടലിനെ
കൊതിയോടെ നോക്കി.
ഫലമുണ്ടായില്ല,
ശ്വസനം നിലച്ചിരുന്നു.

മുമ്പ്
എത്രയോ ശ്വസിച്ചിരിക്കുന്നു.
പക്ഷേ അന്ത്യശ്വാസം
സവിശേഷനിശ്വാസമായി.
ഒരു ജയിൽമുറിയിലെന്ന പോലെ ശ്വാസകോശത്തിൽ
വായുവിനെ പിടിച്ചിടണമെന്നും തോന്നി.

വായുമണ്ഡലമാകെ തിരഞ്ഞിട്ടും
അന്ത്യശ്വാസത്തെ തിരിച്ചറിയാനായില്ല.
വന്നപോലെ പുറത്തേക്കും പോയിരിക്കുന്നു.
ഒരു ഉപകരണം പോലെ
ശ്വാസകോശങ്ങൾ ഉപേക്ഷിക്കപ്പെട്ടു.

അന്ത്യശ്വാസം
മറ്റാരുടെയോ ആദ്യശ്വാസമാകാൻ