എന്താണ് പാമ്പിൻ പള്ളിയുടെ ചരിത്രം? വാസ്ക്കോട ഗാമ കേരളത്തിലെ കാപ്പാട് കടപ്പുറത്തിലേക്ക് കപ്പലോടിച്ച് പോയത് ലക്ഷദ്വീപ് കടലിലൂടെയായിരുന്നു. അതിന് ശേഷം പറങ്കികളുടെ യാത്രാ മാർഗം ഈ ദ്വീപുകൾക്കിടയിലൂടെയായി. ക്രൂരന്മാരായ പറങ്കികളുടെ ആക്രമണത്തിന് ഈ ദ്വീപു സമൂഹങ്ങൾ ഇരയായിക്കൊണ്ടിരുന്നു. സുന്ദരികളായ സ്ത്രീകളെ പിടിച്ച് കൊണ്ടുപോയി പീഡിപ്പിച്ചതിന് ശേഷം കൊന്ന് കടലിലെറിയുക. സ്വർണ്ണങ്ങളും സമ്പാദ്യങ്ങളും കൊള്ളയടിക്കുക എന്നിവ പതിവായിരുന്നു.
അങ്ങനെ ഒരിക്കൽ എ.ഡി. അഞ്ഞൂറുകളിൽ ഒരു സംഘം പറങ്കി പടയാളികൾ അമിനിദ്വീപിൽ അവരുടെ കപ്പലടുപ്പിച്ചു. അമിനിയിൽ പലതരത്തി ലുള്ള അധിക്രമങ്ങളും നടത്തി. അമ്മേനി കച്ചേരി പരിസരത്ത് ഒരു കോട്ട പണിത് ആ ദ്വീപിൻ്റെ ഭരണം പിടിച്ചെടുത്തു.
കണ്ണൂർ അറക്കൽ രാജ വംശം ദ്വീപുകൾ ഭരിക്കുന്ന കാലമായിരുന്നു. അമിനിയിലെ ചിലയാളുകൾ ഓടത്തിൽ കണ്ണൂർ എത്തി വിവരങ്ങൾ ആദി രാജാവിനെ ഭരിപ്പിച്ചു.
രാജാവ് പുറക്കാട് ദേശത്തുള്ള ഒരു യുദ്ധ തന്ത്രജ്ഞനെ അമേനിയിലേക്ക് നിയോഗിച്ചു. അദ്ദേഹം ഒരു പായ കപ്പലിൽ നിത്യോപയോഗ സാധനങ്ങൾ നിറച്ച് അമിനി ദ്വീപിലേക്ക് പുറപ്പെട്ടു. അമിനി എത്താറായപ്പോൾ കപ്പലിലുള്ള കുടിവെള്ള മെല്ലാം കടലിലേക്ക് ഒഴുക്കി കളയാൻ കൽപ്പിച്ചു. എന്നിട്ട് ഒരു അപായ കൊടി കപ്പലിൽ ഉയർത്തിക്കെട്ടാൻ നിർദ്ദേശം കൊടുത്തു.
അപായ കൊടി കണ്ട പറങ്കികൾ തോണിയെടുത്ത് കപ്പലിൻ്റെ അടുത്തേക്ക് വന്നു. കാര്യമന്വേഷിച്ചു. തങ്ങളുടെ കപ്പലിലുള്ള കുടിവെള്ളം തീർന്നിരിക്കുക യാണെന്നും തങ്ങൾക്ക് കുടിവെള്ളം നിറക്കാനുള്ള സൗകര്യം ചെയ്ത് തരണ മെന്നും തന്ത്രശാലി പറങ്കികളോട് ആവശ്യപ്പെട്ടു. പറങ്കികൾ കപ്പൽ പരിശോധിച്ചു. ആയുധങ്ങളല്ല കപ്പലിൽ എന്നും നിത്യോപയോഗ സാധനങ്ങളാണ് കപ്പലിൽ എന്നും മനസിലാക്കിയ പോർച്ചു ഗൽ സംഘം വെള്ളം നിറക്കാനുള്ള സൗകര്യം ചെയ്ത് കൊടുക്കാൻ തീരുമാനിച്ചു. കുറേ നാളായി ഒറ്റപ്പെട്ട ദ്വീപിൽ കഴിയുന്നത് കൊണ്ട് അവർക്കും നിത്യോപയോഗ സാധനങ്ങൾ വേണമായിരുന്നു.
അവർ ആവശ്യപ്പെട്ടത് പ്രകാരം തന്ത്രശാലി നിത്യേപയോഗ സാധനങ്ങൾ പറങ്കികൾക്ക് കച്ചവടം ചെയ്തു. അങ്ങനെ അവർ തമ്മിൽ സൗഹാർദ്ദത്തിലായി. തന്ത്രശാലിക്കും സംഘത്തിനും അമിനിയിൽ യതേഷ്ടം ഇറങ്ങി സഞ്ചരിക്കാനുള്ള അനുവാതം കിട്ടി. അങ്ങനെ അദ്ദേഹം അമ്മേനിയിലെ അന്നത്തെ ഖാളിയായിരുന്ന അബൂബക്കർ ഖാളിയെ ചെന്ന് കണ്ടു. അറക്കൽ രാജാവ് പറങ്കികളെ നേരിടാൻ പറഞ്ഞയച്ച ആളാണെന്നും തൻ്റെ തന്ത്രമിന്നതാണെ ന്നും അറിയിച്ചു. അങ്ങനെ ഇപ്പോൾ പമ്പിൻ പള്ളി സ്ഥിതി ചെയ്യുന്ന സ്ഥലത്ത് പറങ്കികൾക്ക് വിശാലമായ ഒരു വിരുന്ന് ഒരുക്കാൻ തീരുമാനമായി. തന്ത്രശാലിയുടെ സൗഹാർദ്ധത്തിലുള്ള പറങ്കികൾ ഒരു മടിയും കൂടാതെ ക്ഷണം സ്വീകരിച്ചു.
എ.ഡി. അഞ്ഞൂറുകളിൽ അന്നൊരു ദിവസം പറങ്കികൾ വലിയ സന്തോശത്തോടെ വിരുന്നിൽ പങ്കെടുത്തു. വിഭവ സമൃദ്ധമായ ഭക്ഷണത്തിൽ മാരകമായ വിഷം തന്ത്രശാലി കലർത്തിയിരുന്നു. ഭക്ഷണം കഴിച്ച പറങ്കികൾ അവിടെ മരിച്ച് വീണു. ചിലർ അപകടം മനസിലാക്കി അവിടന്ന് ഓടി രക്ഷപ്പെടുകയും കടമത്ത് ദ്വീപിൽ അപയം പ്രാപിക്കുകയും ചെയ്തു. പിന്നീട് തന്ത്രശാലിയുടെ വിടവാങ്ങലിന് ശേഷം കടമത്ത് ദ്വീപിൽ തമ്പടിച്ച പറങ്കികൾ ആയുധങ്ങളുമായി അമിനി ദ്വീപ് ആക്രമിച്ചു. നിരായുധരായ ദ്വീപുകാർ കല്ലും വടിക്കഷ്ണങ്ങളുമായി അബൂബക്കർ ഖാളിയുടെ നേതൃത്വത്തിൽ പറങ്കികളെ നേരിട്ടു. നൂറ് കണക്കിന് നാട്ടുകാർ ശഹീദായി.കൂട്ടത്തിൽ അബൂബക്കർ ഖാളിയും.
അറക്കൽ രാജാവ് അമിനിയിലേക്ക് അയച്ച തന്ത്രശാലി കാതിൽ കടുക്കനിട്ടയാളായിരുന്നു. അത് കൊണ്ട് തന്നെ ആ തന്ത്രശാലിയെ ദ്വീപുകാർ കാതിൽ നഞ്ചക്കാരൻ എന്നാണ് വിളിച്ചത്. എന്ത് വിഷമാണ് പറങ്കികൾക്ക് കൊടുത്തതെന്ന് ചോദിച്ചപ്പോൾ അദ്ദേഹം തയ്യാറാക്കിയ വിഷത്തിൻ്റെ രഹസ്യം പുറത്തറിയാതിരിക്കാൻ പാമ്പിൻ വിഷം എന്ന് ഉത്തരം നൽകി. ആ ഉത്തരത്തിൽ സംതൃപ്തരായ ദ്വീപുകാർ ആ സംഭവത്തിൻ്റെ ഓർമ്മക്കായി പണിത പള്ളിയെ പാമ്പിൻ പള്ളി എന്ന് വിളിച്ചു. ആ പള്ളി പണിതവർ നൽകിയ പേരായ മൗലാപ്പള്ളി എന്നത് പലരും മറന്ന് പോയി. അബൂബക്കർ ഖാളിയുടെ ഖബറിടം അമിനി ജുമുഅത്ത് പള്ളിയിലാണ് സ്ഥിതി ചെയ്യുന്നത്.