അന്താരാഷ്ട്ര ബഹിരാകാശ കേന്ദ്രവുമായി (International Space Station ) ബന്ധപ്പെട്ട രണ്ട് ചൂടൻ വാർത്തകൾ ഈയിടെ മാധ്യമങ്ങളിൽ പ്രത്യക്ഷപ്പെട്ടിരുന്നു. ആദ്യത്തേത് ഇന്ത്യൻ  വംശജയായ ബഹിരാകാശ സഞ്ചാരി സുനിതാ വില്ല്യംസ് (Sunita Williams)  ഭൂമിയിലേക്ക് തിരിച്ചുവരാൻ കഴിയാതെ അന്താരാഷ്ട്ര ബഹിരാകാശ കേന്ദ്രത്തിൽ കുടുങ്ങിക്കിടക്കുകയാണ് എന്നതായിരുന്നു. സുനിതാ  വില്ല്യംസും സഹയാത്രികൻ ബുച്ച് വിൽമോറും  (Butch Wilmore ) ഈ വർഷം ജൂൺ 5 നാണ് ബോയിംഗ് കമ്പനി നിർമ്മിച്ച സ്റ്റാർലിങ് ബഹിരാകാശ വാഹനത്തിൽ (Starling spacecraft ) അന്താരാഷ്ട്ര ബഹിരാകാശ കേന്ദ്രത്തിലെത്തിയത്. ജൂൺ 26 ന് അവർ ഭൂമിയിലേക്കുള്ള മടക്കയാത്ര ആരംഭിക്കേണ്ടതായിരുന്നു. എന്നാൽ സ്റ്റാർലിങ് ബഹിരാകാശ വാഹനത്തിലുണ്ടായ ചില സാങ്കേതിക പ്രശ്നങ്ങൾ കാരണം അവർക്ക് നേരെത്തെ നിശ്ചയിച്ചപോലെ മടക്കയാത്ര നടത്താൻ കഴിഞ്ഞില്ല.  അന്താരാഷ്ട്ര ബഹിരാകാശ കേന്ദ്രം  തകർത്ത്  ഭൂമിയിലേക്ക് തിരിച്ചു കൊണ്ടുവരാൻ ഇലോൺ മസ്കിന്റെ (Elon Musk) സ്പേസ് എക്സ് (SpaceX ) കമ്പനിക്ക് കരാർ കൊടുത്തിരിക്കുന്നു എന്നതായിരുന്നു രണ്ടാമത്തെ വാർത്ത. നാസ (അമേരിക്ക ), റോസ്കോമോസ് (റഷ്യ), ജാക്സ (ജപ്പാൻ ), ഇ. എസ്. എ (യൂറോപ്പ് ), സി. എസ്. എ (കാനഡ ) എന്നീ  അഞ്ച് ബഹിരാകാശ സംഘടനകൾ സംയുക്തമായി 1998 നവംബർ 20 നാണ് ഇന്നുവരെ നിർമ്മിച്ചതിൽ ഏറ്റവും വലിയ ഈ ബഹിരാകാശ കേന്ദ്രം വിക്ഷേപിച്ചത്. തുടക്കത്തിൽ പതിനഞ്ച് വർഷമായിരുന്നു ഇതിന്റെ പ്രതീക്ഷിച്ച ആയുസ്സ്. എന്നാൽ പ്രവചനങ്ങളെയെല്ലാം മറികടന്ന് ഇപ്പോഴും കാര്യമായ കുഴപ്പമൊന്നുമില്ലാതെ അത് ബഹിരാകാശത്ത് ഭ്രമണം ചെയ്തുകൊണ്ടിരിക്കുകയാണ് . ഏറ്റവും കുറഞ്ഞത് 2028 വരെയെങ്കിലും ഇതുപോലെ തുടരാനുള്ള ആരോഗ്യം അതിനുണ്ടെന്നാണ് വിദഗ്ധരുടെ അഭിപ്രായം. അത് കഴിഞ്ഞാൽ അത് സ്വയം തന്നെ ഭൂമിയിലേക്ക് പതിക്കാം. ബഹിരാകാശ കേന്ദ്രത്തിന്റെ  ഭ്രമണപഥം ജനനിബിഡമായ പ്രദേശങ്ങൾക്ക്   മുകളിലൂടെയായതിനാൽ അതിന്റെ പതനം ജനങ്ങളുടെ സുരക്ഷയ്ക്ക് അപകടമുണ്ടാക്കുമെന്നാണ് കരുതപ്പെടുന്നത്. അതാണ് സ്വയം പതിക്കുന്നതിന് മുൻപുതന്നെ അതിനെ ചെറിയ  ഭാഗങ്ങളാക്കി  ഭൂമിയിലേക്ക് തിരിച്ചിറക്കാൻ  ശ്രമിക്കുന്നത്.

മുകളിൽ പറഞ്ഞ രണ്ട് പൊതുധാരാ വാർത്തകൾക്ക് പുറമേ ശാസ്ത്രലോകത്ത് പ്രത്യേക ശ്രദ്ധയുണർത്തിയ മറ്റൊരു വാർത്തകൂടി ഉണ്ടായിരുന്നു. അന്താരാഷ്ട്ര ബഹിരാകാശ കേന്ദ്രത്തിലെ  ബാക്ടീരിയകളെക്കുറിച്ചായിരുന്നു ആ വാർത്ത. ഇന്ത്യക്കാർക്ക്  ഇതൊരു ഇരട്ടിമധുര വാർത്തയാണ്. കാരണം ഈ പഠനത്തിന്റെ നേതൃസ്ഥാനം വഹിച്ചത് നാസയിലെ (NASA) ഇന്ത്യൻ ശാസ്ത്രജ്ഞനായ ഡോ. കസ്തൂരി വെങ്കടേശ്വരനാണ്. കൂടെ മറ്റൊരിന്ത്യക്കാരനായ നിതിൻ കെ. സിങ്ങും.     പ്രസ്തുത പഠനത്തിലെ ചില കണ്ടെത്തലുകളെക്കുറിച്ചാണ് ഈ ലേഖനം.