‘ ഇന്ന് ‘
ഒരു എഞ്ചിനീയർ.
ഇന്നലെ മുതൽ നാളെ വരെയെത്തുന്ന
ഒരു പാലം
അയാൾ പണിയുന്നുണ്ട്.
ദുരന്തഗർത്തങ്ങളിൽ വീഴാതെ
നമുക്ക് മുന്നോട്ട് പോകാൻ…

‘ ഇന്ന് ‘
ഒരു കടത്തുവഞ്ചിക്കാരൻ.
സമയജലത്തിലൂടെ,
വിധിക്കയത്തിൽ മുങ്ങാതെ,
കണ്ണീർത്തിരയിൽപ്പെടാതെ,
അക്കരയ്ക്കെത്തണം.

‘ ഇന്ന് ‘
ഒരു തളിരില.
ഭാവിയിലേക്കുള്ള പ്രയാണത്തിൽ
തളർന്നുപോയ ഉറുമ്പിനെ
കരയ്ക്കടുപ്പിക്കും.

‘ ഇന്ന് ‘
ഒരു ഇറവെള്ളം.
ഇന്നലെ പെയ്ത മഴയെ
നാളേക്കും കരുതിവെക്കും.

‘ ഇന്ന് ‘
ഒരു കനൽ.
നാളേക്കുള്ള വെളിച്ചം
അണയാതിരിക്കും.

അസ്തമയത്തിനും ഉദയത്തിനും
ഇടയിലുള്ള രാത്രിയാണ് ‘ ഇന്ന് ‘.
ഇന്നിലൂടെ ഞാൻ നടക്കുന്നു.
കടലിനപ്പുറത്തെ
ഉദയം കാണാൻ…