ആമുഖം

ഈ ലേഖനം രാഷ്ട്രീയ ചിത്രകലയുടെ ചരിത്രപരമായ മാനങ്ങൾ അന്വേഷിക്കുന്നു. വ്യത്യസ്ത കാലഘട്ടങ്ങളിലും സംസ്കാരങ്ങളിലും  രാഷ്ട്രീയഅധികാരം പ്രകടിപ്പിക്കുന്നതിനും പ്രതിഷേധിക്കുന്നതിനും ആഘോഷിക്കുന്നതിനുമുള്ള ഒരു മാധ്യമമായി ചിത്രകല എങ്ങനെ പ്രവർത്തിച്ചുവെന്ന് കണ്ടെത്താൻ ശ്രമിക്കുന്നു. ഫറവോന്മാരെ മഹത്വപ്പെടുത്തുന്ന പുരാതന ഈജിപ്ഷ്യൻ ചുവർച്ചിത്രങ്ങൾ മുതൽ പള്ളിയുടെ  അധികാരത്തെ പിന്തുണയ്ക്കുന്ന മധ്യകാല മതചിത്രങ്ങൾ, ഭരണാധികാരികൾ അവരുടെ പൊതു വ്യക്തിത്വങ്ങൾ നിർമ്മിക്കാൻ ഉപയോഗിക്കുന്ന നവോത്ഥാനചിത്രകല വരെ  അന്വേഷണ പരിധിയിൽ വരുന്നു. ഇരുപതാം നൂറ്റാണ്ടിൽ, ഏകാധിപത്യ ഭരണകൂടങ്ങളുടെയും ജനാധിപത്യ സമൂഹങ്ങളുടെയും അധികാരപോരാട്ടങ്ങളെ ഒരുപോലെ പ്രതിഫലിപ്പിക്കുന്നതിലേക്ക് രാഷ്ട്രീയചിത്രകല എങ്ങനെ  വികസിച്ചു എന്ന് ഈ പ്രബന്ധം അന്വേഷിക്കുന്നു . രാഷ്ട്രീയസാമൂഹികമൂല്യങ്ങളുടെ ദൃശ്യാവിഷ്കാരങ്ങൾ എന്ന നിലയിൽ ചിത്രങ്ങൾ  കലയുടെയും രാഷ്ട്രീയത്തിൻ്റെയും പരസ്പരബന്ധം വെളിപ്പെടുത്തുന്നതെങ്ങനെയെന്നു പരിശോധിക്കുന്നു . കലാകാരന്മാർ എങ്ങനെ ചരിത്രപരമായി അധികാരം, വിയോജിപ്പ് എന്നിവയിലൂടെ കടന്നുപോയി എന്നതിനെക്കുറിച്ചുള്ള ഉൾക്കാഴ്ച ഈ പഠനം നൽകുന്നു.  സാമൂഹിക പരിവർത്തനത്തിൽ ചിത്രകല ഒരു സുപ്രധാന ശക്തിയാണെന്ന്   സ്ഥാപിക്കുന്നു.

താക്കോൽ വാക്കുകൾ : രാഷ്ട്രീയ ചിത്രകല, ചരിത്രപരമായ മാനങ്ങൾ, ഈജിപ്ഷ്യൻ ചുവർചിത്രങ്ങൾ, മതപരമായ പെയിൻ്റിംഗുകൾ, നവോത്ഥാന ഛായാചിത്രങ്ങൾ ,സാമൂഹിക വിമർശനം.

          സാമൂഹിക മൂല്യങ്ങളുടെയും പ്രത്യയശാസ്ത്രങ്ങളുടെയും സാമൂഹിക  സംഘർഷങ്ങളുടെയും ശക്തമായ പ്രതിഫലനങ്ങളായി ചിത്രകലയെ കാണാം.  ഭരണാധികാരികളുടെ മഹത്തായ ഛായാചിത്രങ്ങൾ മുതൽ പ്രതീകാത്മകത നിറഞ്ഞ അമൂർത്തസൃഷ്ടികൾ വരെ രചിച്ച് കലാകാരന്മാർ രാഷ്ട്രീയവിഷയങ്ങളോട് പ്രതികരിക്കാൻ  അവരുടെ ക്യാൻവാസുകൾ ഉപയോഗിച്ചു. ഇങ്ങനെ  രാഷ്ട്രീയലോകവുമായി കലയുടെ ലോകം വളരെക്കാലമായി ഇഴചേർന്നിരിക്കുന്നത് നമുക്ക് കാണാം .  കലയെ രാഷ്ട്രീയസ്വധീനത്തിനും വിമർശനത്തിനുമുള്ള ശക്തമായ മാധ്യമമാക്കി ചിത്രകാരന്മാർ മാറ്റിയിരിക്കുന്നു . ചരിത്രത്തിലുടനീളം, പെയിൻ്റിംഗുകൾ പ്രചാരണത്തിൻ്റെ ഉപകരണങ്ങളായും പ്രതിരോധ പ്രവർത്തനങ്ങളായും സാമൂഹിക വ്യാഖ്യാനത്തിനുള്ള ഉപാധികളായും ഉപയോഗിച്ചിട്ടുണ്ട്. 

          സ്വേച്ഛാധിപത്യ ഭരണകൂടങ്ങൾ  കലയെ  പലപ്പോഴും കർശനമായി നിയന്ത്രിക്കുന്ന സാഹചര്യമുണ്ട്. നേതാക്കളെ മഹത്വപ്പെടുത്തുന്ന കലകളെ സ്വേച്ഛാധിപതികൾ പ്രോത്സാഹിപ്പിക്കുകയും     വിയോജിക്കുന്ന ശബ്ദങ്ങളെ അടിച്ചമർത്തുകയും ചെയ്യുന്നു.  അതേസമയം ജനാധിപത്യ സമൂഹങ്ങളിൽ, കലാകാരന്മാർക്ക് അനീതികളെ വെല്ലുവിളിക്കാനും വിമർശിക്കാനും ചിന്തയെ പ്രകോപിപ്പിക്കാനുമായി  അവരുടെ സൃഷ്ടികൾ ഉപയോഗിക്കാൻ കൂടുതൽ സ്വാതന്ത്ര്യമുണ്ട്. ആവിഷ്കാരത്തിൻ്റെ ദൃശ്യരൂപം എന്ന നിലയിൽ, രാഷ്ട്രീയ ചിത്രകലകൾക്ക് ജന-ഭരണ വികാരങ്ങൾ പിടിച്ചെടുക്കാനും സംവാദപരിസരങ്ങൾ സൃഷ്ടിക്കാനും സഹാനുഭൂതി ഉണർത്താനും അതുല്യമായ കഴിവുണ്ട്.  പൊതുജനാഭിപ്രായം രൂപപ്പെടുത്തുന്നതിനും സമകാലികമായ  സങ്കീർണ്ണതകളെ പ്രതിഫലിപ്പിക്കുന്നതിനും ചിത്രകാരന്മാർ കലയെ  ഉപകരണമാക്കുന്നു. ഈ ലേഖനം ചിത്രകലയുടെ രാഷ്ട്രീയമാനങ്ങൾ അന്വേഷിക്കുവാനാണ് ശ്രമിക്കുന്നത്.വിവിധ കാലഘട്ടങ്ങളിലും സംസ്കാരങ്ങളിലും പ്രവർത്തിച്ച് ചിത്രകല, മാനവസംസ്കാരത്തിന്റെ   ശക്തിയും പ്രതിഷേധവും മാറ്റവും പ്രതിഫലിപ്പിക്കുന്ന  കണ്ണാടിയായി എങ്ങനെ സൗന്ദര്യശാസ്ത്രത്തെ മറികടക്കുന്നു എന്ന് പരിശോധിക്കുന്നു.

രാഷ്ട്രീയ ചിത്രകലയുടെ ചരിത്രം -ശക്തി, സ്വാധീനം, പ്രത്യയശാസ്ത്രം 

          ചരിത്രത്തിലുടനീളം, കല സമൂഹത്തിൻ്റെ പരിച്‌ഛേദമായി വർത്തിച്ചിട്ടുണ്ട്. വിവിധ കാലഘട്ടങ്ങളിലെ രാഷ്ട്രീയകാലാവസ്ഥകൾ, മൂല്യങ്ങൾ, പ്രത്യയശാസ്ത്രങ്ങൾ എന്നിവ പ്രതിഫലിപ്പിക്കുന്ന ചിത്രങ്ങളിലൂടെ  കലാകാരന്മാർ രാഷ്ട്രീയ വ്യാഖ്യാനം പ്രകടിപ്പിക്കുന്നതിനോ അധികാരത്തെ ആഘോഷിക്കുന്നതിനോ  സാമൂഹികഘടനകളെ വിമർശിക്കുന്നതിനോ ഉള്ള മാധ്യമമായി ചിത്രകലയെ ഉപയോഗിച്ചു   എന്നതാണ് വാസ്തവം.പുരാതന ഈജിപ്റ്റ് മുതൽ ആധുനികകാല സമൂഹങ്ങൾ വരെ, അധികാരം, നീതി, സ്വത്വം, ചെറുത്തുനിൽപ്പ് എന്നിവ എങ്ങനെയാണ് കലാകാരന്മാർ മനസ്സിലാക്കുന്നുവെന്നത്തിന്റെ അടിസ്ഥാനത്തിലാണ്  രാഷ്ട്രീയകല രൂപപ്പെട്ടുവന്നത്.ചരിത്ര കാലഘട്ടത്തിലെ  നാഗരികതകളിലുടനീളമുള്ള രാഷ്ട്രീയ ചലനാത്മകതയെ പ്രതിഫലിപ്പിക്കുന്നതിലും സ്വാധീനിക്കുന്നതിലും പെയിൻ്റിംഗുകൾ സഹായകമായി. 

          പുരാതന നാഗരികതകളിൽ,കല രാഷ്ട്രീയ അധികാരത്തോടും ദൈവികശക്തിയോടും അഗാധമായി  ബന്ധപ്പെട്ടിരിക്കുന്നു.   ഈജിപ്തുകാർ, ദൈവരാജാക്കന്മാരായി കണക്കാക്കപ്പെട്ടിരുന്ന  ഫറവോന്മാരുടെ ശക്തിയും വിശുദ്ധിയും ചിത്രീകരിക്കാൻ ചിത്രങ്ങളും കൊത്തുപണികളും ഉപയോഗിച്ചു. ക്ഷേത്രങ്ങളുടെയും ശവകുടീരങ്ങളുടെയും ചുവരുകളിലെ സ്മാരക പെയിൻ്റിംഗുകൾ  ഫറോവമാരുടെ യുദ്ധരംഗങ്ങൾ,    ആചാര അനുഷ്ഠാനങ്ങൾ, ദൈവ സങ്കല്പങ്ങൾ, രാജ്യം ഭരിക്കാനുള്ള അവരുടെ ദിവ്യാവകാശം  പ്രതീകവല്കരിക്കുന്ന രംഗങ്ങൾ എന്നിവ   ചിത്രീകരിച്ചിട്ടിട്ടുണ്ട് .