മലയാള സാഹിത്യത്തിൽ ഹാസ്യത്തിന്റെ ഹിംസാത്മകവും ധൈഷണികവുമായ ഭാവങ്ങൾ നിറഞ്ഞാടിയത് വി.കെ.എൻ കൃതികളിലായിരുന്നു. ജീവിതവും സാഹിത്യവും നിർമ്മിച്ചുവെച്ച വമ്പൻ നിർമ്മിതികളെയെല്ലാം അത് പൊളിച്ചു കളയുകയും അപനിർമിക്കുകയും ചെയ്തു. അതിനു വേണ്ടി ഭാഷയെ അനനുകരണീയമായ രീതിയിൽ പണിയിച്ചെടുത്തു. ചരിത്രവും രാഷ്ട്രീയവും സാമൂഹ്യബോധവും കൊണ്ട് ഉരുക്കഴിച്ചെടുത്താസ്വദിക്കേണ്ട ഒന്നാക്കി ഹാസ്യത്തെ മാറ്റി. ചരിത്രബോധമോ സാമൂഹ്യബോധമോ ഇല്ലാത്ത അരാഷ്ട്രീയ മനസ്സുകളെ അത് തന്റെ പരിസരത്തുനിന്നും ആട്ടിയിറക്കി. ഹാസ്യവും വിമർശനവും മറ്റാർക്കും സാധ്യമാവാത്ത രാസപാകത്തിൽ നിർമ്മിക്കപ്പെടുന്ന സൃഷ്ടി വൈഭവമാണ് വി.കെ.എൻ കൃതികളിൽ കാണാൻ കഴിയുന്നത്. സമ്പ്രദായിക വിമർശന-ഹാസ്യ- നോവൽ രചനാ രീതികളെ തകർക്കുകയും ആസുരമായി പുനർനിർമിക്കുകയുമാണ് വി.കെ.എന്നിന്റെ രീതി. സമകാലിക കഥാ- നോവലുകളോട് ആ കൃതികൾ അകലം പാലിക്കുകയും തന്നോട് ഇടപെടുമ്പോൾ സൂക്ഷിക്കണമെന്ന
ഓർമ്മപ്പെടുത്തൽ നടത്തുകയും ചെയ്തു.

ഹാസ്യത്തിന്റെ ഹിംസാത്മകത്വം അതിന്റെ
സംഹാര രൂപം പ്രാപിക്കുന്നത് കാണാൻ വി കെ എന്നിന്റെ ‘ കാവി’ വായിച്ചാൽ മതി. ഏതൊരിടത്തും ഫാസിസം വേരുറപ്പിക്കുന്നത് ചരിത്രപരവും രാഷ്ട്രീയവും സാമൂഹികവുമായ പ്രത്യേകതകൾ മുതലെടുത്തു കൊണ്ടായിരിക്കും.മനുഷ്യന്റെ ചിന്താശേഷിയെയും വികാരങ്ങളെയും ലൈംഗികതയെയും അടിച്ചമർത്തിയും മതവിശ്വാസത്തെയും ഭക്തിയേയും ഉപയോഗപ്പെടുത്തിയും മനുഷ്യരെ ഒട്ടാകെ ഇളക്കിവിട്ടും അണിചേർത്തുമാണ് ഫാസിസം വളർന്നിട്ടുള്ളതെന്ന് ചരിത്രം പരിശോധിച്ചാൽ മനസ്സിലാകും.സ്വാതന്ത്ര്യ ലബ്ധിക്കു മുമ്പേ വളർന്നു തുടങ്ങിയ ഹൈന്ദവ ഫാസിസം ഇന്ത്യനവസ്ഥയിൽ മതത്തെയും അതിന്റെ വിശ്വാസപ്രമാണങ്ങളെയും ആത്മീയതയെയും അതിന്റെ നടത്തിപ്പുകാരെയും ജാതിയെയും തരാതരം പോലെ പ്രയോജനപ്പെടുത്തിയാണ് വളർന്നു പന്തലിച്ചത്.ഇന്ത്യയൊന്നാകെ വിഴുങ്ങാൻ കെൽപ്പുള്ള ഒരു രാഷ്ട്രീയ വിപത്തിനെ അതിന്റെ സമഗ്രതയിൽ തിരിച്ചറിയാനും അതിന്റെ പൊള്ളത്തരങ്ങളെ വെളിപ്പെടുത്താനുമുള്ള ധൈര്യം കാണിച്ചുവെന്നതാണ് കാവി എന്ന
കൃതിയുടെ രാഷ്ട്രീയ പ്രാധാന്യം.

കാഷായ ധാരികളെ പൊള്ളിച്ച ‘കാവി’

ആത്മീയ ചിന്തയ്ക്കു മുൻതൂക്കം കൊടുക്കുന്നുവെന്ന് അവകാശപ്പെടുന്ന, ‘ആത്മ’നെ കണ്ട ശേഷം വെന്തു വെണ്ണിറോ രാസവളമോ ആയാൽ മതിയെന്ന് മനോരാജ്യം കാണുന്ന ടാപ്പർ രാമൻ പറഞ്ഞതനുസരിച്ച് ഭാര്യയെയും രണ്ടു കുട്ടികളെയും ഉപേക്ഷിച്ച് ‘ആത്മ’നെ അന്വേഷിച്ചിറങ്ങുന്ന ആളാണ് ‘കാവി’യിലെ ആഖ്യാതാവ്. മലയാ രാജ്യത്ത് റവറ് മരം ടാപ്പ് ചെയ്തും ധാരാളം പണം മോഷ്ടിച്ചും പണക്കാരനായ ടാപ്പർ രാമൻ ആഖ്യാതാവിന്റെ ചിരകാല സുഹൃത്തായിരുന്നു.ബുദ്ധന്റെ മാർഗം പിന്തുടർന്ന് പെണ്ണും പിള്ളേരും ഉറങ്ങിക്കിടന്ന തക്കത്തിലാണ് അയാൾ വീടു വിട്ടിറങ്ങുന്നത്. വണ്ടികൾ മാറിക്കയറി ഹരിദ്വാറിൽ പരമാനന്ദാചാര്യ സ്വാമിയുടെ പർണ്ണ കുടീരത്തിലെത്തുകയും അവിടെനിന്ന് ഷാമിയാർ മിഷനിൽ എത്തിച്ചേരുകയും ചെയ്യുന്നു.പൂജ്യാനന്ദൻ എന്ന് പേരായ ഒരു സ്വാമിയാരായിരുന്നു മിഷന്റെ പരമാധ്യക്ഷൻ. പഴയ പർണശാലയിലെ വിക്രിയകളൊന്നും ഇവിടെ നടപ്പില്ലായിരുന്നു.പഞ്ചനക്ഷത്ര ഹോട്ടലിന്റെ തച്ചുശാസ്ത്രത്തിൻ പടിക്ക് ആശ്രമം പുതുക്കിപ്പണിയുമ്പോൾ സിമന്റും മണലും കല്ലും കോൺക്രീറ്റും ചുമന്ന് പല നിലകൾ കയറിയിറങ്ങേണ്ടുന്ന ദുഷ്കരമായ വേല സ്വാമിമാർക്കായിരുന്നു. കാവിയുടെ പരിവേഷമില്ലായിരുന്നുവെങ്കിൽ തൊഴിലാളി ചൂഷണം എന്ന ഭാഷ്യം ചമയ്ക്കാമായിരുന്നു. ഷാമിയാർ ആശ്രമത്തിലെ രീതികൾ കഥാനായകന്റെ ഉത്സാഹത്തിമിർപ്പിൽ പച്ചവെള്ളം ഒഴിക്കുന്നതായിരുന്നു.അദ്ദേഹത്തിന് ജ്ഞാനയോഗം, കർമയോഗം, ഭക്തിയോഗം, പൊതുയോഗം എന്നിവയായിരുന്നു ഇഷ്ടം. ചുമട്ട് യോഗം അദ്ദേഹത്തിന് വയ്യ! ചുമട്ട് യോഗമായിരുന്നെങ്കിൽ നാട്ടിൽ കൂട്ടിലങ്ങാടിയിൽ കിട്ടുമായിരുന്നു. ശാപ്പാട് കഴിച്ച് ചുമ്മാ കുത്തിയിരിപ്പ് യോഗം
തരമാവുമെന്ന് കരുതിയാണ് അദ്ദേഹം ഇറങ്ങിത്തിരിച്ചത് തന്നെ!
ആഖ്യാതാവിന്റെ മനസ്സിലിരിപ്പ് അറിഞ്ഞ ഗുരു ചാമി “തൽക്കാലത്തേക്ക് നീ ധ്യാനയോഗത്തിലും ചുമട്ട് യോഗത്തിലും വിശ്വസിക്കുക. അവിശ്വാസം അരുത്. ശ്വാസകോശസംബന്ധമായ സുഖക്കേട് വരും.” എന്ന് മുന്നറിയിപ്പ് കൊടുക്കുന്നു.

ഉറങ്ങാനും ചുമട് താങ്ങാനും മന്ത്രമാഗ്രഹിച്ച് മിഷന്റെ ഹെഡ്ഡാപ്പീസിൽ എത്തിയ നായകന് പലവിധ വിഘ്നങ്ങൾ നേരിട്ടെങ്കിലും “ഇക്കാവെ”ന്ന നാമം ഉച്ചരിച്ച മാത്രയിൽ വൈശ്രവാനന്ദ സ്വാമികൾ മന്ത്രമുപദേശിക്കാൻ സന്നദ്ധനാവുകയും കെയർ ഓഫ് ഇക്കാവെന്ന് പറഞ്ഞിരുന്നെങ്കിൽ ചീഫ് ഇന്നലെ തന്നെ മന്ത്രതന്ത്രാദികൾ പാഴ്സലാക്കി തരുമായിരുന്നുവെന്നും പറയുന്നു. നായകന്റെ നീട്ടിയ ചെവിയിൽ “അതെന്ന് പ്രഥമയ്ക്കർത്ഥം” എന്ന മന്ത്രം ഓതി കൊടുക്കുകയും ചെയ്യുന്നു ! ക്രമേണ നായകൻ സ്വാമിമാർക്കുള്ള കോഴിമുട്ടക്കച്ചവടം നിർത്തുകയും വെള്ളം കോരുന്നതിനും വിറകു വെട്ടുന്നതിനും അർദ്ധവിരാമം കളഞ്ഞ് പൂർണ്ണവിരാമമിട്ട് കച്ചവടത്തിൽ നിന്നും സമ്പാദിച്ച തുകയും ‘ബാലബോധിനി’യുമായി ആശ്രമത്തിന്റെ ഓട് പൊളിച്ച് ഡൽഹിക്ക് തിരിക്കുകയും ചെയ്യുന്നു. ശേഷം നായകനൊപ്പം ചാടിയ സ്വാമിയുമായി അച്ചടക്കം തന്നെ കഷ്ടിയായ വിദ്യാവതിയിലെ ആശ്രമത്തിലെത്തുന്നു. പത്രാധിപർ കൂടിയായ സ്വാമി നടത്തുന്ന കിളിമാസികയുടെ സഹപത്രാധിപരാകുന്നു. കാവിയുടെ മറവിൽ സമതലത്തിൽ നിന്നെത്തുന്ന പഞ്ചലോഹ വിഗ്രഹങ്ങൾ പടിഞ്ഞാറ് നിന്ന് എത്തുന്ന ശിഷ്യഗണങ്ങൾക്ക് വിറ്റ് അധിപർ ധാരാളം പണം സമ്പാദിച്ചിരുന്നു. അങ്ങനെയിരിക്കെ അമേരിക്കൻ പര്യടനത്തിനുള്ള അവസരം നായകന് ഒത്തു വന്നുവെങ്കിലും അധിപൻ ചാമിയുടെ ഇടപെടലുകാരണം നടക്കാതെ പോയി. അമേരിക്കൻ പര്യടനം എന്ന സ്വപ്നം മുളയിലെ നുള്ളിയപ്പോൾ ‘കാവി’യിലെ നായകൻ
“എന്തിന് ഞാൻ ഈ കൃഷിക്കിറങ്ങി ?….
അമേരിക്ക എന്ന് കേൾക്കുമ്പോൾ ആത്മൻ പോകുന്ന പോക്ക് കണ്ടോ ? ഒരു വെട്ടിക്കവലച്ചട്ടമ്പി മാതിരി അല്ലേ അധിപൻ ചാമി പെരുമാറിയത്? ” എന്നൊക്കെ ചിന്തിച്ച് വിദ്യാവതി വിട്ടിറങ്ങുന്നു.എന്നാൽ നാട്ടിലെ ദാമോദരൻ മുതലാളി കൊടുത്ത കേസിൽ പ്രതിചാരി രഹസ്യ പോലീസ് അയാളെ നാട്ടിലേക്ക് കൊണ്ടുപോകുന്നു. ഒടുവിൽ മുതലാളിയുടെ ജീവചരിത്രക്കുറിപ്പുള്ള നോവലിലെ അധ്യായം ടിയാനു വായിക്കാൻ കൊടുത്താണ് സദാനന്ദ സ്വാമി കേസിൽ നിന്നും തലയൂരിയത് ! ദാമോദരൻ മുതലാളിയുടെ വീട്ടിൽ നിന്നിറങ്ങി ഉണ്ണാൻ പാകത്തിന് വീട്ടിലെത്തിയ സ്വാമിയെ കണ്ടു പൂർവാശ്രമത്തിലെ സന്തതികൾ
“അമ്മേ പഴയച്ഛൻ വന്നിരിക്കുന്നു” എന്ന് വിളിച്ചു പറയുന്നു.
സ്തബ്ധനായി പുതിയച്ഛനാരെന്ന്
ചോദിക്കുന്ന സ്വാമിയോട് ഭാര്യ
കാർത്ത്യായനി ടാപ്പർ രാമനാണ് പുതിയച്ഛനെന്നും ഒരാൺ തുണ ഒഴിവ് വന്നപ്പോൾ അതിലേക്ക് ടാപ്പർ രാമനെ
നിയമിച്ചുവെന്നും പറയുന്നു. ടാപ്പർ രാമൻ തന്നെ വഞ്ചിച്ചുവെന്ന് സ്വാമിയും ദാമോദരൻ മുതലാളി തന്നെ രക്ഷിച്ചുവെന്ന് കാർത്ത്യായനിയും പറയുന്നിടത്ത് ‘കാവി’ അവസാനിക്കുന്നു.