“രാജാധികാരത്തെയും ദൈവത്തെയും ചുറ്റപ്പെട്ട് എല്ലാം വിഭാവനം ചെയ്യുന്ന ഒരു സമൂഹത്തിൽ നിന്നും ജനാധിപത്യ സമൂഹത്തിൽ എത്തുമ്പോൾ സാധാരണ ജനങ്ങളുടെ ജീവിത ദുരിതങ്ങളും കഷ്ടപ്പാടും സ്വാതന്ത്ര്യത്തിനും തുല്യതയ്ക്കും വേണ്ടിയുള്ള ദാഹവും കലയിലും സാഹിത്യത്തിനും രാഷ്ട്രീയത്തിലും പ്രമേയമാകുന്നുണ്ട്, ആ കാലഘട്ടത്തിന്റെ ഉത്തരവാദിത്തമാണ് ഈ കവി നിർവ്വഹിച്ചിരിക്കുന്നത് “

 

ജ്ഞാന ഭാഷയിലെ ‘കലി കയറിയ ഊർമ്മിള ‘ വായിച്ചു. ഇത് തികച്ചും പുതിയൊരു അറിവാണ്. 1914 ൽ പ്രസിദ്ധീകരിച്ച ‘കലി കേറിയ ഊർമ്മിള’ (രചന ഊർമ്മിള രാഘവൻ കെ.യം.) എന്ന ഈ കൃതി കേരളത്തിലെ കവിതാചരിത്രശാഖയ്ക്കും  നവോത്ഥാന സാഹിത്യത്തിനും ഫെമിനിസ്റ്റ് ചരിത്രത്തിനും ഒരു മുതൽക്കൂട്ടാണ്. കുമാരനാശാൻ്റെ ചിന്താവിഷ്ടയായ സീത (1919) എഴുതുന്നതിന് മുമ്പ് (?)ആധുനിക ജനാധിപത്യ മൂല്യങ്ങളുടെയും സ്ത്രീ സ്വാതന്ത്ര്യത്തിന്റെയും ആശയങ്ങൾ ഉൾക്കൊണ്ടുകൊണ്ട് രാമൻ്റെ രാജ്യധർമ്മത്തെയും നീതിയെയും വിമർശിക്കുന്ന ഈ കൃതി  കൂടുതൽ പഠനവിധേയമാക്കേണ്ടതുണ്ട്. ഈ കവിതയെഴുതിയ കാലഘട്ടം ഫ്യൂഡൽ സമൂഹത്തിൽ നിന്നും  ജനാധിപത്യ സമൂഹത്തിലേക്ക് കേരളം പരുവപ്പെട്ടുകൊണ്ടിരിക്കുന്ന സമയമാണ്, ആ കാലഘട്ടത്തിന്റെ സ്വാധീനത്തിൽ നിന്നുകൊണ്ടാണ് കവി ‘സ്ത്രീക്ക് മനസ്സും വികാരങ്ങളുമില്ലയോ’ ‘വിദ്യാഭ്യാസം തങ്ങൾക്ക് നിഷേധിച്ചതു സ്വാതന്ത്ര്യത്തെ പറ്റി ചോദ്യം ചെയ്യാതിരിക്കാൻ വേണ്ടിയാണ്’ എന്ന് തുടങ്ങിയ ആശയങ്ങൾ ഉന്നയിക്കുന്നത്. അതോടൊപ്പം തന്നെ, രാമായണത്തെപ്പോലെ ഒരു ഇതിഹാസ കൃതിയെ സാമൂഹ്യ വിമർശനത്തിന് കവി പാത്രമാക്കി എന്നുള്ളത് എടുത്തു പറയേണ്ടതുണ്ട്. ബ്രാഹ്മണ്യത്തിന്റെയും പുരുഷാധിപത്യത്തിന്റെയും  എല്ലാ സവിശേഷതകളും ഉൾക്കൊള്ളുന്ന ഒരു മാതൃകാപുരുഷ സങ്കല്പമായിട്ടാണ് രാമനെ പുരാണങ്ങളിൽ അവതരിപ്പിക്കുന്നത്. രാമൻ ചെയ്യുന്ന എല്ലാത്തിനെയും രാജധർമ്മത്തിന്റെയും നീതിയുടെയും അടിസ്ഥാനത്തിൽ നിന്നുകൊണ്ടാണ് പുരാണ കവികൾ വ്യാഖ്യാനിക്കുകയും പിന്തുണക്കുകയും ചെയ്തിട്ടുള്ളത്. പക്ഷേ ആധുനിക ജനാധിപത്യ കാലഘട്ടത്തിൽ കുമാരനാശാൻ ഉൾപ്പെടെയുള്ള സാഹിത്യകാരന്മാർ രാമൻ സീതയോടും ശൂർപ്പണകയോടും ശംബൂകനോടും ചെയ്ത നീതിനിഷേധം വിചാരണ ചെയ്യുന്നുണ്ട്. സ്ത്രീ സ്വാതന്ത്ര്യം ആരെങ്കിലും കൽപ്പിച്ചു നൽകേണ്ടത് അല്ലെന്നും അത് അവർക്ക് അവകാശപ്പെട്ടത് ആണെന്നുമാണ് കവി പറഞ്ഞു വെക്കുന്നത്. ‘ജഗത്തല്ല സ്വർഗ്ഗമാണ് മിഥ്യ’ എന്നതിലൂടെ കവി ശ്രീശങ്കരാചാര്യരുടെ  മിഥ്യ സങ്കല്പത്തിന്റെ അടിസ്ഥാനത്തെയാണ് ചോദ്യം ചെയ്യുന്നത്. രാജാധികാരത്തെയും ദൈവത്തെയും ചുറ്റപ്പെട്ട് എല്ലാം വിഭാവനം ചെയ്യുന്ന ഒരു സമൂഹത്തിൽ നിന്നും ജനാധിപത്യ സമൂഹത്തിൽ എത്തുമ്പോൾ സാധാരണ ജനങ്ങളുടെ ജീവിത ദുരിതങ്ങളും കഷ്ടപ്പാടും സ്വാതന്ത്ര്യത്തിനും തുല്യതയ്ക്കും വേണ്ടിയുള്ള ദാഹവും കലയിലും സാഹിത്യത്തിനും രാഷ്ട്രീയത്തിലും പ്രമേയമാകുന്നുണ്ട്, ആ കാലഘട്ടത്തിന്റെ ഉത്തരവാദിത്തമാണ് ഈ കവിതയിലൂടെ കവി നിർവഹിച്ചിരിക്കുന്നത്, കവിക്ക് നന്ദി..