കവിത വെറും വാക്കുകളല്ല.

ബൽബീർ മദോപുരി

[പഞ്ചാബി കവിയും വിവർത്തകനുമാണ്
ചാങ്ഗിയ റൂഖ് എന്ന ആത്മകഥയിലൂടെ പ്രശസ്തനായി. മൂന്നു കവിതാ സമാഹാരങ്ങൾ പ്രസിദ്ധീകരിച്ചു. കവിതകൾ ഹിന്ദി, ഇംഗ്ലീഷ് , റഷ്യൻ തുടങ്ങിയ ഭാഷകളിലേക്ക് വിവർത്തനം ചെയ്യപ്പെട്ടു. മിട്ടി ബോൽ പായി എന്ന നോവൽ പഞ്ചാബി സാഹിത്യത്തിനുള്ള ദഹൻപുരസ്കാരം നേടി.]

കവിത വെറും വാക്കുകളല്ല.
ചിറകുകളില്ലാത്ത മനുഷ്യന്റെ വിമാനമാണത്.
കവിത വെറും വാക്കുകളല്ല
കരിമ്പിൻ പാടത്തിനു പുറത്തേയ്ക്ക് പറന്നുയരുമ്പോർ പരുന്ത് റാഞ്ചിയെടുത്ത
കറുത്ത തിത്തിരിപ്പക്ഷിയുടെ വേദനിപ്പിക്കുന്ന കരച്ചിലാണത്.
വന്യതയിൽ ഭയന്ന മാനിന്റെ സംഭ്രമത്തോടെയുള്ള നിലവിളിയാണത്.
മരത്തിന്റെ കൊമ്പിൽ ബലമില്ലാതെ തൂങ്ങിക്കിടക്കുന്ന ഇലകളുടെ കഥയാണത്.

കവിത വെറും വാക്കുകളല്ല. മലിനമായ പരിസ്ഥിതിയിൽ ഗുണം നഷ്ടമായ വാക്കുകളിൽ നിന്നുത്ഭവിക്കുന്ന അർത്ഥങ്ങളാണത്.

കവിത വെറും വാക്കുകളല്ല.
ജീവിതത്തിന്റെ ചെങ്കോട്ട കീഴടക്കുന്നതിൽ പരാജയപ്പെട്ടതിന്റെ സങ്കടമാണത്.
ഉയരുകയും താഴുകയും ചെയ്യുന്ന പ്രക്ഷുബ്ധമായ നദീജലത്തിന്റെ വിവരണാതീതമായ കഥയാണത്.
കവിത വെറും വാക്കുകളല്ല. തീരങ്ങൾക്കുനേർ
തുല്യതയ്ക്കായി മല്ലിടുന്ന ഓളങ്ങളുടെയും ദുർബലമായ പ്രവാഹത്തിന്റെയും നൃത്തമാണത്.
ലക്ഷ്യത്തിലേക്ക് ചലിക്കുന്ന റോഡുകളാണത്.

എന്റെ കാലത്തെ കവിത മരണമൂകമായ വാക്കുകൾ .
ഇത് അവയുടെ അർത്ഥത്തിന്റെ അധോഗതി.
കവിതേ, മുദ്രാവാക്യമാകാതെ ആജ്ഞയാവുക കത്തുന്ന കൽക്കരിയല്ല വിറക്കുന്ന കുഞ്ഞുങ്ങൾക്കുമേൽ പിടക്കോഴിയുടെ സുരക്ഷിതമായ ചിറകുകളാവുക

കവിത വെറും വാക്കുകളല്ല
ചിറകുകളില്ലാത്ത മനുഷ്യന്റെ
വിമാനമാണത്.