ആകാശത്തിന് ബദലായി സമുദ്രമുള്ളതുപോലെ ഭൂമിക്ക് ബദലായി മരാളയുണ്ട്. അവിടെ എനിക്ക് പകരം കലനയാണ് ഈ കഥ ഇപ്പോൾ എഴുതുന്നത്. ഒരേ കഥ എഴുതാൻ എനിക്ക് ഭൂമി പോലെ മരാളയും കലനക്ക് ഭൂമിയും പരിചിതമാകണം അതിനുവേണ്ടിയാണ് ഞങ്ങൾ ആരുമറിയാതെ അങ്ങോട്ടുമിങ്ങോട്ടും മാറുന്നത്. കഥ എഴുതി കഴിയുന്നതുവരെ മാറിതാമസിക്കാനാണ് തീരുമാനം. അതിനുവേണ്ടി ഞാൻ വീടിനു വെളിയിൽ വിജനമായൊരിടത്ത് ആരു൦ കാണുന്നില്ലെന്നുറപ്പാക്കി ശരീരത്തിൽ നിന്നിറങ്ങി വായുവിൽ ലയിക്കും കാറ്റെന്നെ അതിനു സഹായിക്കും പിന്നെ മരാളയിൽ ചെല്ലുമ്പോൾ അവിടുത്തെ റാല കാറ്റിന് മരാളയിൽ അങ്ങനെയാണ് പറയുക എന്നെ ഫാഠയിൽ (മരാളയിലെ വായു) ലയിപ്പിക്കും. കലനയും ഭൂമിയിൽ എത്തുക ഇങ്ങനെയാണ്. ബഹിരാകാശത്ത് എത്തുമ്പോൾ വൈദ്യുത-കാന്തിക മണ്ടലങ്ങൾ ഒക്കെക്കൂടി പിടിച്ച് ഒരൊറ്റ വലിയാണ്. ആ ആക്കത്തിൽ ബ്ലാക്ക് ഹോളിലൂടെ തെറിച്ച്  ഞാൻ മരാളയിലും കലന ഭൂമിയിലും എത്തും ഇതാണ് ഞങ്ങളുടെ പ്ലാൻ.

 ഞങ്ങൾ പരിചയപ്പെടുന്നത് ഒരു ഇടവപ്പാതി ശക്തി പിടിച്ച രാത്രിയിലാണ്. അന്ന് ഞാൻ ഈ ഭൂമിമലയാളത്തിൽ ഇരുന്ന് അമ്മയോട് പറഞ്ഞതും കലന മരാളയിൽ ഇരുന്ന് അവളുടെ സ്റ്റോപ്പയോട് പറഞ്ഞതും ഒരേ കഥയായിരുന്നു. പെട്ടെന്ന് മുട്ടൻ ഒരു ഇടി വെട്ടി. അണ്ഡകടാഹം മുഴുവൻ ഞെട്ടി മേഘം രണ്ടായി പിളർന്നു അപ്പോൾ മരാളയിലും അങ്ങനെ ഇടിവെട്ടി. ചുറ്റി ചുറ്റി ഭൂമിയ്ക്ക് മുകളിൽ സമാന്തരമായി മരാള വന്ന ദിവസമായിരുന്നു അത്. അങ്ങനെ ഒരു കൊള്ളിയാൻ ശബ്ദത്തിൽ കൊള്ളിയാൻ വെട്ടത്തിൽ കൊള്ളിയാൻ നേരത്ത് ഞങ്ങൾ കണ്ടു.

 പിന്നെ പിന്നെ ഇടിവെട്ടുമ്പോളൊക്കെ ഞങ്ങൾ കണ്ടു. അപ്പോഴൊക്കെ മരാള ഭൂമിയുടെ 8 ദിക്കുകളിൽ എവിടെയെങ്കിലുമൊക്കെയായിരുന്നു. ഞങ്ങൾ ഭൂമിയെക്കുറിച്ചും മരാളയെക്കുറിച്ചും സംസാരിച്ചു. പച്ചയുടെ വൈവിധ്യത്തെക്കുറിച്ചാണ് ഞാൻ പറഞ്ഞത് ഓരോ മരത്തിനും ഓരോ പച്ചയാണ്. ഒരു മരത്തിൽ തന്നെ എത്രയെത്ര പച്ച വൈവിധ്യങ്ങൾ. എന്നാൽ കലന പറഞ്ഞ നിറം എന്നെ അത്ഭുതപ്പെടുത്തി. അവൾ മരാളയിലെ കറുപ്പിന്റെ വൈവിധ്യങ്ങളെക്കുറിച്ച് വാചാലയായി.

 ഇളം കറുപ്പ്, കടും കറുപ്പ്, ആകാശക്കറുപ്പ്, ചാണകക്കറുപ്പ്, തത്തക്കറുപ്പ്! എനിക്കെന്തോ അത് വിശ്വസിക്കാൻ തോന്നിയില്ല. കറുപ്പിന് എങ്ങനെയാണ് വൈവിധ്യങ്ങൾ ഉണ്ടാകുന്നത്? എങ്കിലും ഞാൻ കേട്ടിരുന്നു. പച്ച നിറം കണ്ടില്ലെങ്കിൽ മനുഷ്യ മനസ്സിന്റെ താളം തെറ്റുമെന്ന് എവിടെയോ വായിച്ചിരുന്ന ഞാൻ മരാളയിലേക്ക് പോകാൻ അൽപ്പമൊന്ന് ഭയന്നു. ഭൂമിയിൽ കറുപ്പ് കണ്ണിന് പിടിക്കാത്ത നിറമാണ് മരാളയിൽ എങ്ങനെയാണ് എനിക്ക് കാഴ്ചയുണ്ടാകുമോ? വെളിച്ചമില്ലാതെ കാണാൻ കഴിയുന്നതാണോ മരാളയിലെ കറുപ്പ് അതോ മരാളയിൽ കറുപ്പിന് വെളിച്ചമുണ്ടാകുമോ? കറുത്ത വെളിച്ചത്തെക്കുറിച്ച് ഞാൻ ചിന്തിച്ചു… മലയാളത്തിൽ ഇരുണ്ട വെളിച്ചമേ ഉള്ളൂ കറുത്ത വെളിച്ചമില്ല. ടൂറിസ്റ്റ് ബസ്സിന്റെ ലേസർ വെട്ടങ്ങളിൽ പച്ച പോലെ മഞ്ഞ പോലെ നീല പോലെ ചുവപ്പ് പോലെ ഒന്ന് കറുപ്പിന്റേതായിരുന്നെങ്കിൽ എനിക്ക് ഇങ്ങനെ സംശയമുണ്ടാവില്ലായിരുന്നു. ക്രിസ്മസിന് തൂക്കുന്ന മാല ബൾബിൽ ഒരു നിറം കറുപ്പായിരുന്നെങ്കിൽ… ഞാൻ കറുത്ത വെളിച്ചം സങ്കൽപ്പിച്ചെടുത്തു. അതിന് ഒരു തിളക്കമുണ്ടായിരുന്നു. കരിനീലയോട് സാമ്യമുണ്ടെങ്കിലും അത് കറുപ്പ് തന്നെയായിരുന്നു. കറുപ്പിന് ഇത്രയും ഭംഗിയുണ്ടെന്ന് ഞാനറിയുന്നത് ഇപ്പോഴാണ്. അങ്ങനെ മരാളയിലേക്ക് പോകാൻ എനിക്ക് ധൈര്യം കിട്ടി. കലനക്കും  ഇങ്ങനെ ആകുലതകൾ ഉണ്ടാകുമോ?

 ‘നെനക്ക്‌ ഭൂമിലേക്ക് വരാൻ പേടിണ്ടോ?’

 ‘ദെർലോ? (എന്തിന്?)’

 ‘പുതിയ ഒരിടത്തെത്തുന്നതിന്റെ?’

 ‘ഡേർ സാക് സ്ട്രൈസ്.( എനിക്ക് പുതിയ ഇടങ്ങൾ ഇഷ്ടമാണ്.)’

 പിന്നെ ഞാൻ അതിനെ പറ്റി ഒന്നും ചോദിച്ചില്ല. മരാളയിലേക്ക് പോകാൻ കൊള്ളിയാൻ കാത്ത് ഇറങ്ങി നിൽക്കുകയാണ്.

വോപണാൽ (രണ്ട്)

കലനയുടെ വീട്ടിലെത്തിയപ്പോൾ 27 മണിയായി അവരുടെ ക്ലോക്കിൽ 34 വരെയുള്ള അക്കങ്ങൾ ഉണ്ട്. അപ്പോൾ ഒരു ദിവസ൦ 68 മണിക്കൂറോ! കലന സമയത്തെപ്പറ്റിയൊന്നു൦ എന്നോട് പറഞ്ഞിരുന്നില്ല. ഭൂമിയേക്കാൾ എത്ര സമയ൦ പിന്നിലാണ് മരാള… മൂന്ന് ദിവസ൦ അടുത്ത് വ്യത്യാസ൦!. കലനയു൦ ഞാനു൦ സമപ്രായക്കാരായാണ് എനിക്ക് തോന്നിയിട്ടുള്ളത്. എന്നാൽ കലന എന്നിലു൦ വർഷങ്ങൾക്കു മുമ്പേ ജനിച്ച, എന്നിലു൦ ചെറുപ്പമാകാൻ പോകുന്ന ഒരു കുട്ടിയാണെന്ന് എനിക്ക് മനസ്സിലായി.

ചെന്ന പാടേ സ്റ്റോപ്പ എനിക്ക് ലെർസയു൦ മോപ്പയും (ചായയും പലഹാരവും) കൊണ്ടുതന്ന് ഞാൻ ആരാണെന്ന് പോലു൦ തിരക്കാതെ അടുക്കളയിലേക്ക് കയറിപ്പോയി. ഞാനത് കഴിച്ചു. കലന ഞങ്ങളുടെ പ്ലാൻ സ്റ്റോപ്പയോട് പറഞ്ഞു കാണുമെന്ന് ഞാൻ ഊഹിച്ചു. അവരുടെ ഭാഷ എനിക്ക് വശമില്ലെന്ന് കരുതിയാവു൦ ഒന്നു൦ മിണ്ടാഞ്ഞത്. എങ്കിലു൦ ഒന്ന് ചിരിക്കാമായിരുന്നു. ചിലപ്പോൾ സ്റ്റോപ്പ കലനയോട് പോകെണ്ടന്ന് പറഞ്ഞുകാണു൦ അവൾ വഴക്കിട്ടാവു൦ ഇറങ്ങിയത്. എന്തായാലു൦ ഞാൻ അവിടെ  ഇരുന്നു. ജനലഴിക്കപ്പുറത്ത് മരാള കണ്ടുകണ്ടിരുന്നു…