കനി

എഴുത്തെല്ലാം ലാപ്പിലും
മൊബൈലിലും
കൈയ്യക്ഷരം ഇന്ന് കാണാക്കനി

ഇടം

ചെറുമൻ്റെ കുടിലിന്
ചാളയെന്നും
വെളുത്ത കൊറ്റിയുടെ കൂടിന്
കൊറ്റില്ലമെന്നും
പേരിട്ടത് ഏതോ ആര്യനാവാം

രുചി

വിശപ്പു പോലെ രുചിയുള്ള
ഒരപ്പവും ഭൂമിയിൽ
എങ്ങുമില്ല

പേര്

ആമാശയത്തിലെത്തുന്നത്
ചോറ്
തലച്ചോറിലെത്തുന്നത്
ആശയം
ആരാണിവയ്ക്ക് ഇങ്ങനെ
പേരിട്ടത്?

ഒന്ന്

കവിത ചൊല്ലാനും കേൾക്കാനും
കഥ പറയാനും കേൾക്കാനും

കഥയും കവിതയും
കേൾക്കാമെങ്കിൽ
രണ്ടിനും കഥയെന്നോ കവിതയെന്നോ
പറഞ്ഞു കൂടേ?

അടയാളം

പുലിയ്ക്ക്
പുള്ളി അടയാളം
ക്രൗര്യം മുറ്റിയതുകൊണ്ടാകാം
നമ്മൾ പുള്ളിപ്പുലിയെന്ന്
വിളിക്കുന്നത്

പേര്

കുറുക്കന് കൂർമ ബുദ്ധി
കൂർമമെന്നാൽ
കൗശലമേയില്ലാത്ത ആമയുടെ പര്യായം

വിശുദ്ധി

ശോധന വിശുദ്ധമായതായിരിക്കാം പരിശോധന

മടി

കാക്കയെന്നൊരു പക്ഷി
ഇല്ലാതിരുന്നെങ്കിൽ
കുയിൽ
മടിയനല്ലാതാകുമായിരുന്നു

അച്ഛൻ

അച്ഛനുമമ്മയും
കെട്ടിപ്പിടിച്ചുറങ്ങിയ
വിരൽവീതിക്കട്ടിൽ
തെക്കോട്ടിറങ്ങിയപ്പോൾ
പുറത്തേയ്ക്കിട്ടു
ഇപ്പോൾ കമാനമുള്ള
തൂവൽ കിടക്ക
കള

മുറ്റത്തെ കളകളെല്ലാം
പറിച്ചെറിഞ്ഞു
ചട്ടിയിൽ വളർത്തിയ
കാട്ടു കളകൾ
പുമുഖത്തും
സ്വീകരണ മുറിയിലും
ചിരിച്ചു തലയാട്ടുന്നു