പഞ്ചാബിലെ സിക്ക് വംശജനായ പിതാവിനും ഹംഗേറിയക്കാരിയായ മാതാവിനും 2013 ജനുവരി 30 ന് ബുഡാപെസ്റ്റിൽ ജനിച്ച അമൃത ഷേർഗിൽ അഞ്ച് വയസ്സു മുതൽ ചിത്രങ്ങൾ വരച്ചിരുന്നു. ജീവിതത്തിൻ്റെ ആദ്യകാലം ഹംഗറിയിൽ ആയിരുന്നു. 1921 ൽ ഇന്ത്യയിലേയ്ക്ക് അമൃതയുടെ കുടുംബം താമസം മാറ്റി. എട്ടാം വയസ്സിൽ ചിത്രകലാ പരിശീലനം നേടി. ചിത്രകാരനായ അമ്മാവൻ്റെ പിന്തുണ അമൃതയ്ക്ക് ലഭിച്ചിരുന്നു. കുടുംബത്തിലെയും പരിചയ സീമയിലുള്ളവരെയും രചനകളുടെ മോഡൽ ആയി സ്വീകരിക്കാൻ അമ്മാവൻ്റെ നിർദ്ദേശാനുസരണം തുടങ്ങി.

പാരീസ് വിട്ട് ഇന്ത്യയിലേയ്ക്ക് കുടുംബത്തോടൊപ്പം കുടിയേറുമ്പോൾ തന്നെ ഒരു കലാകാരി എന്ന നിലയിൽ തൻ്റേതായ വ്യക്തിമുദ്ര പതിപ്പിച്ചു കഴിഞ്ഞിരുന്നു, അമൃത ഷേർഗിൽ. ഇന്ത്യയിൽ തൻ്റെ വർണ്ണ പ്രപഞ്ചത്തിന് തനതായ ഒരിടം ലഭിക്കും എന്നവർ പൂർണ്ണമായും വിശ്വസിച്ചിരുന്നു. അതിനു കാരണം അവരുടെ പ്രൊഫസർ തന്നെയായിരുന്നു. പശ്ചാത്യർ പൊതുവെ ഇളം നിറങ്ങളായിരുന്നു കൂടുതലായും ഉപയോഗിച്ചതും പ്രയോഗിച്ചതും. അമൃത ഷേർഗിലിൻ്റെ വർണ്ണ വൈഭവം തിരിച്ചറിഞ്ഞ പ്രൊഫസർ അതിന് യഥാർത്ഥ വ്യക്തിത്വം കണ്ടെത്താൻ പടിഞ്ഞാറിനേക്കാൾ കിഴക്കിൻ്റെ അന്തരീക്ഷമാണ് സഹായിക്കുക എന്ന് പറഞ്ഞിരുന്നു. അത് പിൽക്കാലത്ത് ശരിയായി തീരുന്നതായി കാണാം. പടിഞ്ഞാറൻ അന്തരീക്ഷത്തേക്കാൾ അമൃതയുടെ വർണ്ണങ്ങൾക്ക് അതിൻ്റെ യഥാർത്ഥ നിറവും വെളിച്ചവും ലഭിച്ചത് കിഴക്കിൻ്റെ അന്തരീക്ഷത്തിൽ തന്നെയാണ്. അവർ പരിചയിച്ച അക്കാദമിക് ശൈലിയിൽ നിന്നും തികച്ചും വ്യത്യസ്തമായ ദിശയിലേക്കാണ് അമൃതയുടെ കലാസൃഷ്ടികൾ സഞ്ചരിച്ചത്. അവ ഇന്ത്യയിലെ സാധാരണക്കാരുടെ ജീവിതവും പ്രവർത്തികളും അജന്തയിലെയും മറ്റും ഭിത്തി ചിത്രങ്ങളോട് ചേർന്ന് പോകുന്നവയായിരുന്നു. തദ്ദേശീയമായ കലാരചനകൾക്ക് താൻ പരിശീലിച്ച യൂറോപ്യൻ സാങ്കേതിക വിദ്യകൾ  അവർ പ്രയോഗിച്ചു. പരന്നതും ലളിതവും ശക്തവുമായ നിറങ്ങളിലൂടെയുള്ള പുതിയ ശൈലിയിൽ ചിത്രങ്ങൾ രചിക്കാൻ തുടങ്ങി. ഇന്ത്യയിൽ അന്ന് പ്രചാരത്തിൽ ഉണ്ടായിരുന്ന യൂറോപ്യൻ രചനാരിതിയായിരുന്ന ജലച്ചായ ചിത്രങ്ങളുടെ നിരാസം കൂടിയായിരുന്നു, അമൃതയുടെ ഈ പുതിയ പരീക്ഷണം. തൻ്റേതായ കലാ ശൈലി ഉപയോഗിച്ച് ഇന്ത്യൻ കലാരംഗത്തെ അവർ നവീകരിച്ചു.  

     അമൃത ഷേർഗിലിൻ്റെ ചിത്രങ്ങളെ പഠനവിധേയമാക്കിയാൽ അവ മുമ്പ് നിലനിന്ന തരത്തിലുള്ള സ്ത്രീ രൂപങ്ങൾ ആയിരുന്നില്ല. ഇത് വ്യക്തമാകണമെങ്കിൽ അവരുടെ ആദ്യകാല ചിത്രം മുതൽ പിൽക്കാല രചനകൾ വരെ സൂഷ്മമായി അപഗ്രഥിക്കണം.

ചെറുപ്പകാരികൾ ( Young Girls)