കുട്ടികളുടെ മാനസികവളർച്ചയിൽ രക്ഷാകർതൃത്വത്തിന്റെ പങ്കു ചെറുതല്ല. കുട്ടികളിലെ സാമൂഹിക വികസനം തുടങ്ങി, ഭാവാത്മക, ബൗദ്ധിക വികസനത്തിലും രക്ഷാകർതൃത്വം ഒരു വലിയ പങ്കുവഹിക്കുന്നുണ്ട്. രക്ഷകർതൃത്വം ബാല്യകാലത്തെ മാത്രമല്ല, അവരുടെ കൗമാര ജീവിതത്തെയും യൗവ്വന ജീവിതത്തെയും, അവർ സ്വീകരിക്കുന്ന മാതാപിതൃത്വ ശൈലിയെയും അനുകൂലമായോ പ്രതികൂലമായോ ബാധിക്കാവുന്നതാണ്. ചില മാതാപിതാക്കൾ അവരുടെ കുട്ടികളുടെ വ്യക്തിത്വത്തെയും ആവശ്യങ്ങളെയും മൂല്യപ്പെടുത്തി കാണുന്നു. എന്നാൽ ചില മാതാപിതാക്കൾ ദോഷകരമായ രീതിയിലുമാണ് പെരുമാറുന്നത്. കുട്ടികളുടെ ജീവിതം വിഷമാക്കി അവരുടെ വളർച്ച തടയുന്ന ഇത്തരത്തിലുള്ള മാതാപിതാക്കളെ “ടോക്സിക് മാതാപിതാക്കൾ” (Toxic Parents) എന്ന് പറയുന്നു. സൂസൻ ഫോർവേഡിന്റെ(2002) അഭിപ്രായത്തിൽ, തുടർച്ചയായി ആധിപത്യമുള്ള മോശമായ പെരുമാറ്റശൈലികൾ വഴി കുട്ടികളെ പ്രതികൂലമായി സ്വാധീനിക്കുന്ന മാതാപിതാക്കളെയാണ് ടോക്സിക് മാതാപിതാക്കൾ എന്ന് വിശേഷിപ്പിക്കുന്നത്. സൈക്കോളജിസ്റ്റും എഴുത്തുകാരിയുമായ സൂസൻ ഫോർവേർഡിന്റെ ടോക്സിക് പാരന്റിങ് എന്ന പുസ്തകമാണ് ഈ വിഷയത്തെക്കുറിച്ച് ആധികാരികമായി സംസാരിക്കുന്ന ഏറെ ജനശ്രദ്ധ പിടിച്ചു പറ്റിയ പുസ്തകങ്ങളിൽ ഏറ്റവും പ്രധാനമായത്. സൈക്കോളജിസ്റ്റായ സൂസൻ ഫോർവേഡ് തന്റെ ഔദ്യോഗിക ജീവിതത്തിൽ കണ്ടുമുട്ടിയവരുടെ അനുഭവങ്ങളെ മുൻനിർത്തി വളരെ ആധികാരികവും മനോഹരവുമായാണ് ടോക്സിക് പാരന്റിങ് എന്ന വിഷയത്തെ തൊണ്ണൂറുകളുടെ അവസാനത്തിൽ തന്റെ പുസ്തകത്തിലൂടെ പൊതുസമൂഹത്തോട് വിളിച്ചു പറഞ്ഞത്. പുസ്തകത്തിന്റെ രണ്ടാം പതിപ്പ് 2002ലാണ് പുറത്തുവന്നിരുന്നത്, അത് കഴിഞ്ഞ് 20 വർഷം പിന്നിടുമ്പോഴും ടോക്സിക് പാരന്റിങ്ങിനെ ആസ്പദമാക്കി നടന്നിട്ടുള്ള ഭൂരിഭാഗം പഠനങ്ങളുടെയും അടിസ്ഥാനം സൂസൻ ഫോർവേർഡിന്റെ പുസ്തകം തന്നെയാണ്. സൂസൻ ഫോർവേഡിന്റെ കാഴ്ചപ്പാടിൽ ഒരു കുട്ടിയുടെ ജീവിതത്തിൽ സ്ഥിരതയുള്ളതും ആധിപത്യമുള്ളതുമായ മോശമായ പെരുമാറ്റശൈലികളുള്ള മാതാപിതാക്കൾ ധാരാളമുണ്ട്. കുട്ടിക്ക് ഏറ്റവും വലിയ ഹാനി ഉണ്ടാക്കുന്നത് ഇത്തരക്കാരാണ്. ഇത്തരം മാതാപിതാക്കളെ വിവരിക്കാൻ ഒരു പദത്തെ കുറിച്ച് ആലോചിക്കുമ്പോൾ തന്റെ മനസ്സിൽ വന്നത് ടോക്സിക് എന്ന പദം ആണെന്നാണ് സൂസൻ ഫോർവേഡ് പുസ്തകത്തിൽ പറയുന്നത്. രാസവിഷം പോലെ തന്നെ, ഇത്തരത്തിലുള്ള മാതാപിതാക്കൾ കുട്ടികളിൽ വിതറുന്ന നാശം അവരുടെ ജീവിതത്തിലുടനീളം വ്യാപിക്കുന്നു. അവർ കുട്ടികളിൽ ഉണ്ടാക്കുന്ന വേദന കുട്ടികൾ വളരുമ്പോൾ അവരോടൊപ്പം തന്നെ വളരുന്നു. തുടർച്ചയായ അതിക്രമവും അപമാനവും സ്വന്തം കുട്ടികൾക്ക് ഏർപ്പെടുത്തുന്ന മാതാപിതാക്കളെ വിവരിക്കാൻ ടോക്സിക് എന്ന പദത്തിനേക്കാളും അനുയോജ്യമായ മറ്റൊന്നില്ല എന്നാണ് സൂസൻ ഫോർവേഡ് പറയുന്നത്. ടോക്സിക് എന്ന ഇംഗ്ലീഷ് പദത്തിന്റെ അർത്ഥം വിഷം എന്നാണ് . അങ്ങനെ നോക്കുമ്പോൾ വിഷപരമായ രക്ഷകർതൃത്വം എന്നതാവും ടോക്സിക് പേരന്റിങ്ങിന്റെ മലയാളം. രക്ഷകർതൃത്വത്തിന്റെ പലതരം ദൂഷ്യഫലങ്ങളെ പറ്റി പഠനങ്ങളും ചർച്ചകളും നടന്നിട്ടുണ്ടെങ്കിലും കേരളത്തിന്റെ സാംസ്കാരിക പശ്ചാത്തലത്തിൽ ടോക്സിക് പേരന്റിങ് പഠനങ്ങളുടെ വലിയൊരു അഭാവം തന്നെ ഉണ്ട്. ഇതിനുള്ള പ്രധാന കാരണങ്ങളിൽ ഒന്ന് കേരളത്തിന്റെയും അതുപോലെ ഇന്ത്യയുടെയും സാംസ്കാരിക വ്യവസ്ഥ ആവാം . മാതാപിതാക്കളെ ദൈവത്തിനു മുകളിൽ കാണാൻ കുട്ടികളെ പഠിപ്പിക്കുന്ന ഒരു സംസ്കാരത്തിൽ നിന്നുകൊണ്ട് ടോക്സിക് പേരൻഡിങ് അതിന്റെ പൂർണ്ണതയിൽ ഉൾക്കൊള്ളുകയും മനസ്സിലാക്കുകയും ചെയ്യുക എന്നത് അത്ര എളുപ്പമല്ല. നമ്മുടെ സാംസ്കാരിക വ്യവസ്ഥയിൽ മാതാപിതാക്കൾ ശിക്ഷിക്കുന്നതും ശാസിക്കുന്നതും നല്ലതിന് വേണ്ടി മാത്രമാണ് എന്നാണ് കരുതപ്പെടുന്നതും അങ്ങനെ തന്നെ കരുതാനാണ് കുട്ടികളെയും പരിശീലിപ്പിക്കുന്നത്. ഇതിനർത്ഥം ടോക്സിക് പേരൻഡിങ് നമ്മുടെ നാട്ടിൽ നിലനിൽക്കുന്നില്ല എന്നല്ല. അതിനെ തിരിച്ചറിയാനും ഉൾക്കൊള്ളാനും നമ്മൾ പ്രാപ്തരല്ല എന്നാണ് , നമ്മളെല്ലാവരും വളർന്നുവന്ന സംസ്കാരവും കൈമാറപ്പെട്ട മൂല്യങ്ങളും ആവാം അതിനുള്ള കാരണം. പരമ്പരാഗത ഇന്ത്യൻ സംസ്കാരം കൂട്ടായ്മയ്ക്ക് പ്രാധാന്യം നൽകുന്നതും അധികാര സ്ഥാനീയർക്ക് ശക്തി നൽകുന്നതുമാണ്. അതിനാൽ, ഇന്ത്യൻ രക്ഷാകർതൃത്വം ഒരു തരത്തിൽ സ്വേച്ഛാധിപത്യ സ്വഭാവമുള്ളതാണ്. ഇത് അനുസരണത്തിനും അച്ചടക്കത്തിനും കൂടുതൽ ശ്രദ്ധ നൽകുകയും, കുട്ടി എല്ലാ കാര്യങ്ങളിലും മികച്ച പ്രകടനം കാഴ്ചവെക്കണമെന്ന് പ്രതീക്ഷിക്കുകയും ചെയ്യുന്നു. സ്വേച്ഛാധിപത്യ രക്ഷാകർതൃത്വം ലാളന കുറഞ്ഞതും ഉയർന്ന പ്രതീക്ഷകൾ ഉള്ളതുമായതിനാൽ, രക്ഷാകർതൃത്വം പലപ്പോഴും മഹത്വവൽക്കരിക്കപ്പെടുന്നു, കൂടാതെ ശാരീരിക ശിക്ഷകളും ദുരുപയോഗവും പരമ്പരാഗത ഇന്ത്യൻ സംസ്കാരത്തിൽ ഒരു പരിധി വരെ ന്യായീകരിക്കപ്പെടുന്നു. അങ്ങനെ, സംസ്കാരം ഒരു തരത്തിൽ ടോക്സിക് പേരന്റിങ്ങിന് സ്വാധീനിക്കുന്നു; ഒരു രക്ഷിതാവും പൂർണ്ണനല്ല, അവർക്ക് അവരുടെ സ്വന്തം രക്ഷാകർതൃത്വത്തിൽ നിന്നും സാമൂഹിക പഠനത്തിലൂടെയും രക്ഷാകർതൃത്വം പഠിക്കാൻ കഴിഞ്ഞേക്കും. കുട്ടികളെ ശിക്ഷിക്കുന്ന രീതികൾ ഇന്ത്യൻ സംസ്കാരത്തിൽ ന്യായീകരിക്കാവുന്നതിനാൽ, രക്ഷിതാക്കൾക്ക് അവരുടെ രക്ഷാകർതൃത്വ ശൈലികളിൽ തെറ്റൊന്നും കണ്ടെത്താൻ കഴിഞ്ഞെന്ന് വരില്ല, അവരുടെ കുട്ടികൾക്ക് തങ്ങളുടെ രക്ഷകർതൃത്വത്തിലെ പ്രശ്നങ്ങൾ തിരിച്ചറിയാനും അതിനെ അഭിമുഖീകരിക്കാനും കഴിഞ്ഞെന്ന് വരില്ല. അവബോധമില്ലായ്മയും ഇവിടെ ഒരു പ്രധാന കാരണമായേക്കാം; ചില രക്ഷിതാക്കൾ അവർക്ക് ലഭിച്ച അതേ രക്ഷാകർതൃത്വത്തെ അനുകരിക്കാൻ സാധ്യതയുണ്ട്. ദമ്പതികൾക്കിടയിലുള്ള ആശയവിനിമയത്തിന്റെ അഭാവവും പൊരുത്തമില്ലായ്മയും പോലും വിഷലിപ്തമായ രക്ഷാകർതൃത്വത്തിന് കാരണമായേക്കാം, കൂടാതെ ജോലി സമ്മർദ്ദം, സാമ്പത്തിക പ്രശ്നങ്ങൾ, ബന്ധങ്ങളിലെ പ്രശ്നങ്ങൾ തുടങ്ങിയ ബാഹ്യ സമ്മർദ്ദങ്ങളും രക്ഷാകർതൃ വിഷാംശത്തിന് സഹായിച്ചേക്കാം. അതുപോലെ, രക്ഷിതാക്കളുടെ മാനസികാരോഗ്യ പ്രശ്നങ്ങളും രക്ഷാകർതൃ വിഷാംശത്തിന് ഒരു കാരണമായേക്കാം. കൂടാതെ, രക്ഷിതാക്കൾ കുട്ടികളായിരുന്നപ്പോൾ ഉണ്ടായതും സുഖപ്പെടുത്താത്തതുമായ മുറിവുകളും അവരുടെ രക്ഷാകർതൃത്വത്തെ പ്രതികൂലമായി ബാധിച്ചേക്കാം, തലമുറകളായി കൈമാറി വരുന്ന ആഘാതവും ഒരു കാരണമായേക്കാം.
രക്ഷകർതൃത്വത്തെ അത്രമേൽ പവിത്രമായ ഒന്നായി കാണപ്പെടുന്നതിനാൽ എത്ര പ്രായം ചെന്നാലും മാതാപിതാക്കൾ തങ്ങൾക്ക് ഏൽപ്പിച്ച മുറിവുകളെ കുറിച്ച് മനസ്സിലാക്കാനോ മനസ്സിലാക്കിയാൽ തന്നെ അതിനെക്കുറിച്ച് തുറന്നു പറയാനോ പറ്റാതെ വരുന്നു. ഇനി മനസ്സിലാക്കിയാൽ തന്നെ അത് പലപ്പോഴും പ്രത്യക്ഷത്തിൽ ഉള്ളതിനെ കുറിച്ച് മാത്രമാണ് ടോക്സിക് പാരന്റിക് അങ്ങനെയല്ല ടോക്സിക് പാരെന്റിങ്ങിന്റെ ഇരയാകപ്പെടുന്ന കുട്ടികൾ ജീവിതകാലം മുഴുവൻ അതിന്റെ അനന്തഫലം അനുഭവിക്കേണ്ടിവരുന്നു. ടോക്സിക് പാരെന്റിംഗ് കുട്ടികളിൽ ഉത്കണ്ഠ, കുറഞ്ഞ ആത്മവിശ്വാസം, കുറ്റബോധം, മാതാപിതാക്കളെ നിരാശപ്പെടുത്തുമെന്ന് ഉള്ള ഭയം, അവരുടെ അംഗീകാരങ്ങൾക്കും നിബന്ധനകളില്ലാത്ത സ്നേഹത്തിനും വേണ്ടിയുള്ള ആഗ്രഹം,സമ്മർദ്ദം, ഉറക്കക്കുറവ്, സ്വന്തം കഴിവിൽ വിശ്വാസമില്ലായ്മ, വിഷാദം,സാമൂഹ്യ ബന്ധങ്ങളുടെ തുടങ്ങി ചെറുതും വലുതുമായ ഒട്ടനവധി മാനസിക പ്രശ്നങ്ങളിലേക്ക് നയിക്കുന്നുവെന്ന് പഠനങ്ങൾ കണ്ടെത്തിയിട്ടുണ്ട് . ടോക്സിക് പേരെന്റിങ്ങ് കുട്ടികളുടെ ജീവിതത്തിൽ ദീർഘകാല പ്രതിഫലനങ്ങൾ ഉണ്ടാക്കാൻ സാധ്യതയുണ്ട്.ഒരു കുട്ടിക്ക് തന്റെ കുട്ടിക്കാലത്ത് നേരിടേണ്ടി വന്ന പ്രശ്നങ്ങളുടെ ഫലം പിന്നീട് അവനോ അവളോ കുടുംബം സ്ഥാപിച്ച ശേഷം പോലും തുടരാൻ സാധ്യത ഉണ്ടെന്നും പഠനങ്ങൾ തെളിയിക്കുന്നു. കൂടാതെ കുട്ടികളുടെ ഭാഷാ കഴിവുകളും ടോക്സിക് മാതാപിതൃത്വം മൂലം ബാധിക്കപ്പെടുന്നുണ്ട്. അങ്ങനെ ഒരു കുട്ടിയുടെ വളർച്ചയിൽ ഉടനീളവും പിന്നീട് അങ്ങോട്ടുള്ള ജീവിതത്തിലും ടോക്സിക് പാരന്റിംഗിന്റെ പാർശ്വഫലങ്ങൾ കാണപ്പെടുന്നു .
ടോക്സിക് പാരന്റിംഗിന്റെ തരങ്ങൾ
സൂസൻ ഫോർവേഡിന്റെ കാഴ്ചപ്പാടിൽ അപര്യാപ്തമായ മാതാപിതാക്കൾ (Inadequate Parents), നിയന്ത്രകരായവർ (Controllers), മദ്യപാനികൾ (Alcoholics), വാക്കുകളിലൂടെ അതിക്രമം ചെയ്യുന്നവർ (Verbal Abusers), ശാരീരിക അതിക്രമം ചെയ്യുന്നവർ (Physical Abusers), ലൈംഗിക അതിക്രമം ചെയ്യുന്നവർ (Sexual Abusers) എന്നിങ്ങനെ വിവിധ തരത്തിലുള്ള ടോക്സിക് പേരന്റ്സ് ഉണ്ട്.എല്ലാത്തിന്റെയും പ്രത്യേകതകളും വ്യത്യാസങ്ങളും അനുസരിച്ച് സൂസൻ ഫോർവേഡ് ഓരോന്നിനെയും വിശദീകരിച്ചിട്ടുമുണ്ട് . പ്രാപ്തരായ രക്ഷിതാക്കൾ ഒരു കുട്ടിയുടെ ശാരീരികവും വൈകാരികവുമായ ആവശ്യങ്ങൾ നിറവേറ്റുകയും, വൈകാരികവും ശാരീരികവുമായ ദോഷങ്ങളിൽ നിന്ന് അവരെ സംരക്ഷിക്കുകയും, ശ്രദ്ധയും സ്നേഹവും വാത്സല്യവും ധാർമ്മികവും ധാർമ്മികവുമായ മാർഗ്ഗനിർദ്ദേശങ്ങളും നൽകുകയും ചെയ്യും. ഇതെല്ലാം ചെയ്യാൻ കഴിയാത്ത രക്ഷിതാക്കൾ അപര്യാപ്തരാണ്. അപര്യാപ്തമായ രക്ഷിതാക്കൾ ഒരു കുട്ടിയുടെ ജീവിതത്തിൽ അദൃശ്യരാണെന്നും, അവരുടെ ആത്മാഭിമാനത്തിന് ക്ഷതമേൽപ്പിച്ചുകൊണ്ട് അവരുടെ കുട്ടിക്കാലം കവർന്നെടുക്കുകയും, അത് അവരുടെ മുതിർന്ന ജീവിതത്തിലേക്ക് വലിച്ചിഴയ്ക്കുകയും ചെയ്യും എന്നാണ്. നിയന്ത്രകരായവർ കുട്ടികളെ നിയന്ത്രിക്കാൻ അവരുടെ അധികാരം ഉപയോഗിക്കുന്നു. അവർ തന്ത്രശാലികളാണ്, അവരെ ആവശ്യമുള്ളവരാണെന്ന് തോന്നിപ്പിക്കാൻ സാഹചര്യങ്ങൾ സൃഷ്ടിക്കുകയും, പിന്നീട് സഹായിയുടെ വേഷം കെട്ടുകയും, സഹായം നൽകുന്നതിലൂടെ കുട്ടികളെ സ്വാധീനിക്കുകയും നിയന്ത്രിക്കുകയും ചെയ്യുന്നു. ചിലർ കുട്ടികളെ ആശ്രിതരാക്കാൻ പണം ഉപയോഗിക്കുന്നു, മറ്റുള്ളവർ കുട്ടികളിൽ കുറ്റബോധം അടിച്ചേൽപ്പിക്കുന്നു. മറ്റൊരു വിഭാഗമാണ് മദ്യപാനികൾ, മാതാപിതാക്കൾ മദ്യമോ മയക്കുമരുന്നോ ഉപയോഗിക്കുന്ന കുടുംബങ്ങളിലെ മാനസികവും വൈകാരികവുമായ അന്തരീക്ഷം ഏതാണ്ട് സമാനമാണ്. സഹ-ആശ്രിതത്വം എന്നത് ബന്ധങ്ങളിലുള്ള അനാരോഗ്യകരമായ ആശ്രയത്വമാണ്, സഹ-ആശ്രിതനായ രക്ഷിതാവ് മദ്യപാനത്തിന്റെ ഫലങ്ങളെ തീവ്രമാക്കുന്നു. വാക്കുകളിലൂടെ അതിക്രമം ചെയ്യുന്നവരാണ് മറ്റൊരുതരം ,അവർ കുട്ടിയുടെ രൂപം, കഴിവ്, ബുദ്ധി തുടങ്ങിയവയുടെ അടിസ്ഥാനത്തിൽ അവരെ വാചികമായി ആക്രമിക്കുന്നു, ഇത് പ്രത്യക്ഷമോ പരോക്ഷമോ ആകാം. ചില രക്ഷിതാക്കൾ തമാശകളും ഇരട്ട അർത്ഥങ്ങളുമുള്ള വാക്കുകളും ഉപയോഗിച്ച് പരോക്ഷമായ വാചികാക്രമണം നടത്തുന്നു. ചില രക്ഷിതാക്കൾ ശാരീരികമായി ദുരുപയോഗം ചെയ്യുന്നവരാണ്, കുട്ടികളെ ശിക്ഷിക്കാൻ ശാരീരിക ശിക്ഷണം മാത്രമാണ് ഫലപ്രദമായ മാർഗ്ഗം എന്ന് അവർ വിശ്വസിക്കുന്നു. മിക്കവാറും ശാരീരികമായി ദുരുപയോഗം ചെയ്യുന്ന രക്ഷിതാക്കളും നിറവേറ്റപ്പെടാത്ത മാനസികാവശ്യങ്ങളും വൈകാരികമായ കുറവുകളുമായിട്ടാണ് രക്ഷാകർതൃത്വത്തിലേക്ക് പ്രവേശിക്കുന്നത്. ചില രക്ഷിതാക്കൾ കുട്ടികളെ ലൈംഗികമായി ദുരുപയോഗം ചെയ്യുന്നു; ഇതിൽ ലൈംഗിക താൽപ്പര്യത്തോടെ കുട്ടിയുടെ ജനനേന്ദ്രിയം, മലദ്വാരം, സ്തനം, വായ അല്ലെങ്കിൽ മറ്റേതെങ്കിലും ശരീരഭാഗങ്ങളിൽ സ്പർശിക്കുന്നത് ഉൾപ്പെടുന്നു. പല രക്ഷിതാക്കളും കുട്ടികളെ ലൈംഗിക ബന്ധത്തിന് നിർബന്ധിക്കാൻ ശാരീരിക അക്രമം ഉപയോഗിക്കുന്നു. ചില ഇരകൾക്ക് പിന്നീട് അവരുടെ ജീവിതത്തിൽ അടുപ്പമുള്ള ബന്ധങ്ങൾ സ്ഥാപിക്കുന്നതിനും ആരോഗ്യകരമായ ലൈംഗിക ജീവിതം നയിക്കുന്നതിനും ബുദ്ധിമുട്ടുണ്ടാകുന്നു.
പരിഹാര മാർഗ്ഗങ്ങൾ
മാതാപിതാക്കൾ അവരുടെ തെറ്റുകൾ തിരിച്ചറിയുന്നതിനും അംഗീകരിക്കുന്നതിനും ധാരാളം സമയവും പരിശ്രമവും ആവശ്യമാണ്; ഇത് തന്നെ വളരെ ബുദ്ധിമുട്ടുള്ള കാര്യമാണ്, പ്രത്യേകിച്ചും മാതാപിതാക്കളെ ദൈവങ്ങളെപ്പോലെ കണക്കാക്കുന്ന കൂട്ടായ്മ സംസ്കാരത്തിൽ. സ്വന്തം മാതാപിതാക്കൾ ടോക്സിക് ആണെന്ന വസ്തുത തിരിച്ചറിയുകയും അംഗീകരിക്കുകയും ചെയ്യുക എന്നതാണ് ആദ്യപടി, ഉൾക്കാഴ്ച നേടിയ ശേഷം അതിനെ നേരിടുക എന്നതാണ് അടുത്ത ഘട്ടം. മാനസിക ആരോഗ്യത്തെ മുൻനിർത്തി തക്കതായ സേവനങ്ങൾ തേടുന്നതും ഗുണകരമായിരിക്കും വ്യക്തിഗത തെറാപ്പി, ഗ്രൂപ്പ് തെറാപ്പി, റോൾ പ്ലേകൾ, കോഗ്നിറ്റീവ് ബിഹേവിയറൽ തെറാപ്പി, ഐ മൂവ്‌മെന്റ് ഡീസെൻസിറ്റൈസേഷൻ ആൻഡ് റീപ്രോസസ്സിംഗ് (EMDR) തെറാപ്പി എന്നിവ ഉൾപ്പെടുന്ന പ്രൊഫഷണൽ സഹായം തേടുന്നത് ഇരകളെ സുഖപ്പെടുത്താനും മികച്ച ജീവിതം നയിക്കാനും സഹായിക്കും. ടോക്സിക് പേരൻസിന്റെ കുട്ടികൾ വളർന്നുവരുമ്പോൾ അവരുടെ ഉള്ളിലെ മുറിവുകൾ വ്യക്തിപരവും സാമൂഹികവും തൊഴിൽപരവുമായ ജീവിതത്തിൽ വിവിധ തരത്തിൽ പ്രതിഫലിച്ചേക്കാം, ഇരകൾ കുറ്റബോധം ഉള്ളിലാക്കുകയും ഇത് ആത്മവിശ്വാസക്കുറവ്, സ്വയം സംശയം, വിഷാദം, ഉത്കണ്ഠ, ആത്മാഭിമാനക്കുറവ്, സമ്മർദ്ദം സഹിക്കാനുള്ള കഴിവില്ലായ്മ, ചിന്താശേഷി തുടങ്ങിയവയിലേക്ക് നയിക്കുകയും ചെയ്യും. അവർ അഭിമുഖീകരിക്കുന്ന പ്രശ്നങ്ങളുടെ മൂലകാരണം തിരിച്ചറിയാനുംസ്വയം സംശയം, സ്വയം കുറ്റപ്പെടുത്തൽ എന്നിവ ഒഴിവാക്കാനും മികച്ച ജീവിതം നയിക്കാനും മാനസികാരോഗ്യ പ്രവർത്തകരുടെ സഹായം തേടുന്നതിലൂടെ സാധിക്കും. ഒരുനാൾ മുതിർന്ന വ്യക്തിയായി വളരുന്ന ഒരു കുട്ടിയുടെ അതിജീവനത്തിന് ടോക്സിക് മാതാപിതാക്കളുമായുള്ള ബന്ധം വിച്ഛേദിക്കുന്നത് പ്രധാനമാണ്. എന്നാൽ അത് സാധ്യമാവണമെന്നില്ല , പക്ഷേ തിരിച്ചറിവ് ഉണ്ടായിക്കഴിഞ്ഞാൽ മാനസികമായി അകലുന്നതാണ് എന്തുകൊണ്ടും നല്ലത് . മാനസികമായി അകലുക എന്നതുകൊണ്ട് ഉദ്ദേശിക്കുന്നത് മാതാപിതാക്കളുടെ പെരുമാറ്റമോ വഴക്ക് പറച്ചിലുകളോ മറ്റു പീഡനങ്ങളോ മാനസികമായി ബാധിക്കാത്ത ഒരിടത്തേക്ക് നമ്മൾ നമ്മളെ തന്നെ കൊണ്ടെത്തിക്കുക എന്നതാണ്. ഏതു പ്രായത്തിലാണോ ഈ തിരിച്ചറിവ് ഉണ്ടാവുന്നത് അപ്പോൾ മുതൽ ഇങ്ങനെയൊരു മാനസിക അകൽച്ചക്ക് വേണ്ടി തയ്യാറാവുക തന്നെ വേണം.ഒരു കുട്ടിക്ക് മാതാപിതാക്കളുമായി നല്ല ബന്ധം പുലർത്താനും അവരുടെ നിരുപാധികമായ സ്നേഹം സ്വീകരിക്കാനും എല്ലാ അവകാശവുമുണ്ട്, നിർഭാഗ്യവശാൽ ടോക്സിക് മാതാപിതാക്കളുടെ മക്കളുടെ സ്ഥിതി മറിച്ചാണ്. അതിനാൽ യാഥാർഥ്യം മനസിലാക്കുകയും അത് ഉൾകൊണ്ട് തങ്ങളുടെ ജീവിതം മെച്ചപ്പെടുത്താൻ ഇനി എന്ത് ചെയ്യാനാകും എന്ന ആലോചിച്ച് അതിന് വേണ്ടി പ്രയത്നിക്കുക ആണ് വേണ്ടത്. ചില കുട്ടികൾ അതിജീവന തന്ത്രമെന്ന നിലയിൽ മുറിവുകളെ അംഗീകരിക്കാതെ നിഷേധിക്കുകയോ അടിച്ചമർത്തുകയോ ചെയ്യും, എന്നാൽ അംഗീകാരം മാത്രമേ മുക്തി നേടാൻ സഹായിക്കൂ. ഇന്ത്യൻ സംസ്കാരം രക്ഷാകർതൃത്വത്തെ മഹത്വവൽക്കരിക്കുന്നു എന്നതു കൊണ്ട് രക്ഷകർതൃത്വത്തിൻ്റെ പേരിൽ എന്ത് ചെയ്താലും, ന്യായീകരിക്കാനാവില്ല; കുട്ടിയുടെ ജീവിതം മൊത്തത്തിൽ മോശമായി ബാധിക്കുന്നതാണ് അവയെങ്കിൽ. ടോക്സിക് മാതാപിതാക്കൾ സൃഷ്ടിച്ച മാനസികാഘാതങ്ങളെ നേരിടാനുള്ള മറ്റൊരു മാർഗ്ഗം പ്രതീക്ഷ ഉപേക്ഷിക്കുക എന്നതാണ്; ഒരു ദിവസം രക്ഷിതാവ് തിരിച്ചറിയുകയും ഖേദിക്കുകയും എല്ലാം ശരിയാകുകയും ചെയ്യുമെന്ന പ്രതീക്ഷ ഉപേക്ഷിക്കേണ്ടത് ആണ്, ഇങ്ങനെയുള്ള മാതാപിതാക്കളിൽ നിന്ന് ഒരു പ്രതീക്ഷയും വെക്കാതെ സാഹചര്യങ്ങളെ ഉൾകൊണ്ട് മുന്നോട് പോവുക ആണ് വേണ്ടത്. ടോക്സിക് മാതാപിതാക്കൾ കുട്ടികളിൽ ധാരാളം അടിസ്ഥാനരഹിതമായ വിശ്വാസങ്ങൾ അടിച്ചേൽപ്പിച്ചിരിക്കാം, കുട്ടിക്കാലത്ത് രക്ഷിതാക്കൾ കുട്ടിയുടെ ലോകത്തിൻ്റെ കേന്ദ്രമായതിനാൽ, കുട്ടി അത് അങ്ങനെ തന്നെ വിശ്വസിച്ചിരിക്കാം, അത് ഉത്കണ്ഠ, സ്വയം സംശയം തുടങ്ങിയവയിലേക്ക് നയിക്കാം. അത്തരം വിശ്വാസങ്ങൾ മാറ്റുകയും അവയെ മാറ്റിസ്ഥാപിക്കുകയും ചെയ്യുന്നത് പരിഗണിക്കുകയും മാനസികാരോഗ്യ വിദഗ്ധരുടെ സഹായത്തോടെ കൈകാര്യം ചെയ്യുകയും വേണം. കൂടാതെ, ജീവിത നൈപുണ്യ വികസന പരിപാടികൾ, മറ്റ് പോസിറ്റീവ് സൈക്കോളജി ഇടപെടലുകൾ എന്നിവ വിഷലിപ്തരായ രക്ഷിതാക്കളുടെ കുട്ടികളെ നിലവിലുള്ള മുറിവുകൾ സുഖപ്പെടുത്താനും മികച്ച ജീവിതം നയിക്കാനും സഹായിക്കും. അതുപോലെ, മറുവശത്ത്, കുട്ടികളെ വളർത്താൻ പദ്ധതിയിടുന്ന രക്ഷിതാക്കളെയും ദമ്പതികളെയും ബോധവൽക്കരിക്കുക. രക്ഷിതാക്കളുടെ പിന്തുണാ ഗ്രൂപ്പുകൾ രൂപീകരിക്കുന്നതിലൂടെ അനുഭവങ്ങൾ പങ്കുവെക്കാനും അവബോധം ഉണ്ടാക്കാനും സഹായിക്കും. രക്ഷകർത്തൃത്വം പവിത്രമായ ഒന്ന് തന്നെയാണ്. എന്നിരുന്നാലും ടോക്സിക് പാരന്റിങ് പോലുള്ള ഹാനികരമായ രീതികളും നിലനിൽക്കുന്നുണ്ട് അത് അംഗീകരിക്കുകയും അവ കുട്ടികളിൽ ഉണ്ടാക്കുന്ന പ്രശ്നങ്ങളുടെ മനസ്സിലാക്കി കൃത്യമായ ഇടൽ ഇടപെടലുകൾ നടത്തുകയും ചെയ്യുക അത്യാവശ്യം ആണ് .
കേരളത്തിന്റെയും ഇന്ത്യയുടെയും സംസ്കാരം എത്രമേൽ മാതാപിതാക്കൾ പവിത്രമായി കാണുന്നു തന്നെ അതിന്റെ ദൂഷ്യഫലങ്ങളെ കാണാതെയും പോകുന്നു . ഇത് മാറേണ്ട സമയം അതിക്രമിച്ചിരിക്കുന്നു. ടോക്സിക് പാരന്റിങ് പോലുള്ള വിഷയങ്ങളെ പറ്റി കൂടുതൽ ചർച്ചകളും പഠനങ്ങളും ആവിശ്യമാണ്. മറ്റു രാജ്യങ്ങളിൽ ടോക്സിക് പാരന്റിങ് ചർച്ച ചെയ്യപ്പെടുകയും പഠിക്കുകയും ചെയ്യപെടുമ്പോഴും നമ്മുടെ രാജ്യത്തിൽ വളരെ വളരെ കുറവ് ആണ് , അത് ഒരിക്കലും ടോക്സിക് പാരന്റിങ്ങിന്റെ അഭാവം കൊണ്ടല്ല അതിനോടുള്ള അവബോധം ഇല്ലാത്തതു കൊണ്ടാണ്. ഇനിയുള്ള പഠനങ്ങൾ ടോക്സിക് പാരന്റിങ് ആധികാരികമായ മനസിലാക്കുന്നതിലും അളക്കുന്നതിലും ശ്രദ്ധചെലുത്തിയാൽ നമ്മുടെ കുട്ടികൾക്കു അത് സഹായകമാവും, ഒപ്പം മാതാപിതാക്കൾ ആവാൻ ആഗ്രഹിക്കുന്നവർക്കും അങ്ങനെ പൊതു സമൂഹത്തിനും സഹായകമാവും.അതിനോടൊപ്പം കുട്ടികളുടെ മാനസികാരോഗ്യം മുൻനിർത്തി അവർക്ക് വേണ്ട മാനസികാരോഗ്യ സേവനങ്ങൾ ലഭ്യമാക്കേണ്ടതും ആണ് .

ഗ്രന്ഥസൂചി
ഫോർവേഡ്, എസ്. (2002). ടോക്സിക് പാരന്റ്സ്: ഓവർകമിംഗ് ദെയർ ഹർട്ട്ഫുൾ ലെഗസി ആൻഡ് റീക്ലെയിമിംഗ് യുവർ ലൈഫ്.