ചെക്കട്ടു കുളത്തിൽ

കുളിക്കാൻ പോയി

വെയിൽ ചായും നേരം

പടവുകളിൽ പടർന്ന് കേറിയ

തണലിലിരുന്നു

കുളം അതിൻ്റെ ചാത്തനെ

വെള്ളത്തിൻ്റെ അറകളിലെവിടെയോ

ഒളിപ്പിച്ചു വച്ചിട്ടുണ്ട്

കണ്ടെടുക്കണം

മീതെ

മാന്ത്രിക പൂവുകൾ മയങ്ങുന്നു

കുളത്തിലേക്ക് ചാഞ്ഞ

കണിക്കൊന്നയിൽ

മീൻകൂട്ടം പാർക്കുന്നു

ഒരു കൊമ്പേറി

ആമ്പൽ മൊട്ടായി തല നീട്ടുന്നു

വട്ടയിലകൾക്ക് മീതെ

വെയിൽ നനയാൻ

ഒരു കുളക്കോഴിപ്പിട

ചിറക് കുടയുന്നു

കരയിലൊരു പുള്ളി പശു

പാൽ നിറച്ച

അകിടുമായി മേയുന്നു

കുളം അതിൻ്റെ പച്ചകളെ

ആഴത്തിലേക്ക് ആവാഹിക്കുന്നു

സൂര്യൻ അതിനെ

മാന്ത്രിക വെളിച്ചമായി

കരയിലേക്ക് വല കെട്ടുന്നു

ആഴങ്ങളിൽ നിന്ന് ഉറവ കൊണ്ട

നിറങ്ങൾ

പടവുകളിൽ ചിത്രങ്ങൾ നെയ്യവേ

ഒരു മന്ദമാരുതൻ ഓളങ്ങളിൽ നിന്ന്

നിഴലിൻ്റെ ഉരുവം പോൽ

പറന്നേറി

പുള്ളി പശുവിനെ ചുറ്റുന്നു

അത്

ഇമയനക്കാതെ 

പാൽ ചുരത്തുവാൻ വെമ്പുന്നു

നിറങ്ങളുടെ മാന്ത്രിക വടിയുമായി

ഞാൻ കുളത്തിലേക്ക് ചാടുന്നു

ആഴങ്ങളിൽ മുങ്ങി താഴവെ

കരയിലെ മരങ്ങളെല്ലാം

പക്ഷികളെല്ലാം

മൃഗങ്ങളെല്ലാം

അടിവാരത്തുണ്ട്

കര കാണാത്ത കടലിൽ പെട്ട

മീനു പോൽ

നീന്തി തുടിക്കവെ

ഉയിരിളക്കത്തിൽ

കാറ്റിലുലഞ്ഞു പോയ ചാത്തൻ

ജീവൻ്റെ മാന്ത്രിക വടിക്കായി

കേഴുന്നു

നിറങ്ങളെത്താത്ത

നിഴലുറങ്ങുന്ന ചാത്തൻ കോട്ട

ഉള്ളിലെവിടെയോ ഒണ്ട്

പിടിച്ച പിടി കൊണ്ടുപോണം

മെരുങ്ങാത്തതിനെ

മെരുക്കുമ്പോഴുള്ള സുഖം

കവിതക്ക് ചേല്

മൂന്നുരു1

ആണ2 യിടീച്ച്

കൂടെ കൊണ്ട് പോകും വഴി

പടിഞ്ഞാറേ ചെരുവിലൊരു ചെങ്കീരി

മാളത്തിലേക്ക് ഊളിയിട്ടു

നായ്ക്കൾ ഓരിയിട്ടു

ഉള്ളിലിരിക്കുന്ന ചാത്തൻ രഹസ്യം

ആർക്കറിയാം

നീണ്ട വഴികളെല്ലാം

ചെറുതായി

നീങ്ങുന്നേയില്ല നടത്തം

ഞാനെന്നിൽ തന്നെ

ചുറ്റുകയാണോ?

മരങ്ങളെല്ലാം ഇരുട്ടായി

ചെടികളെല്ലാം പാമ്പുകളായി

തലയാട്ടുന്നു

വീട് എത്തുന്നില്ല

കുളത്തിൽ നിന്ന് കര കയറിയോ?

കുളത്തിലേക്ക് ചാടിയ

കണിക്കൊന്നയുടെ കൊമ്പൊന്നിൽ

മൂന്നാം നാൾ

പൊന്തും വരെ

നീയോ ചാത്തൻ

ഞാനോ?

1. മൂന്നുരു – മൂന്ന് തവണ
2. ആണ – സത്യം