ചുവന്നുചുവന്ന്
അവളേക്കാൾചുവന്ന്
സ്വർണ്ണനിറമുള്ള സായന്തനം.
മെലിഞ്ഞുമെലിഞ്ഞ്
അവളേക്കാൾമെലിഞ്ഞ്
ഉരുകിയൊഴുകുന്നപുഴ.

മണൽപരപ്പിൽ
ഉണങ്ങിപ്പോയൊരു
കൊതുമ്പുവഞ്ചി.
ജലപ്പരപ്പിൽ അവളുടെ
നോവുകൾ തൂവിപ്പോയ
കനൽപാടുകൾ.

ആകാശത്തിലേതോ
ചിത്രകാരൻകുടഞ്ഞിട്ട
കറുത്തമഷിയുടെ ചിറകൊച്ച .
നീണ്ടുവളർന്ന പച്ചപ്പുല്ലിൽ
പറന്നിറങ്ങിയ മേഘത്തുണ്ട്.

അഴിഞ്ഞുലഞ്ഞമുടിയിഴകളിൽ
കാറ്റുപടരുന്നു.
പീലിത്തുമ്പിലെ നീർത്തുള്ളിയിൽ
സൂര്യനൊളിക്കുന്നു.
നനഞ്ഞുനനഞ്ഞ് പുഴയുടെയുടലിൽ
കണ്ണീർ ഉപ്പുകലർത്തുന്നു.

ഇഴഞ്ഞിഴഞ്ഞൊരു
നാഗംപോലെ സ്വർണ്ണനിറമുള്ള
പടംപൊഴിക്കുന്ന വാനം.
കനത്തുകനത്ത് അവളേക്കാൾ
കനത്തുപോകുന്നരാവ്.

ഇരുണ്ട പുഴയുടെ കൈപിടിച്ച്
കടലുകാണാൻ പോകുന്നവൾ
മൂന്നാംപക്കം
തിരിച്ചുവരാമെന്നൊരു ദൂത്
കാറ്റിന് കൈമാറുന്നു!